CYMA Football - A thiam pali chiah an dam ta Armed Veng Vs Bethlehem VT; Hnahthial Joint Vs Chanmari

Suzuki Gixxer SF 250 20th Inter Branch YMA Football Tournament semifinal chu vawiin chhun dar 12:00 aṭangin khelh ṭan a ni dawn. Vawi nga champion tawh Armed Veng hmaah Bethlehem Vengthlang an ding ang a, tlai dar 2:00-ah Hnahthial Joint leh Chanmari ten final khel tur an zawng chhunzawm ang.

Bethlehem Vengthlang coach Lawmzuala Pautu chuan, "Champion kan châkzia sawi turin thuin a daih lo," tiin Vanglaini a hrilh a, football tui venga cheng CYMA Football la champion lo chuan BVT team enkawltu thusawi hi an man thiam ang.

Kum 2002 khan Bethlehem Vengthlang hian final an thleng a, an nomawi beiseina chu Dintharin an tihtawp sak. Hemi hnu hian sang tak taka invawrh chang nei mah se final an thleng leh tawh lo. BVT hi football thiam veng an ni nachungin inelna hnuhnung berah last 16 an thlen phak loh avangin seeded an ni lo a, semifinal khel tur zinga match nga khel awmchhun an ni.

MPL club nei ṭhin veng BVT hi veng lian nih avangin anmahni ringawt pawha Lammual tikhat thei an ni a, Armed Veng tan tawrhhlelhawm an ni pha ang. Chutihrualin team ṭha zawka ngaih Armed Veng enkawltu Lalbiaksanga Colney hian BVT FC a enkawl tawh a, an khingpui tur team hi a hrechiang - hriat tel atana ṭha chu Armed Veng hi seeded team an ni phak bik lo!

BS-a Colney chuan, "BVT hi ka player hriatchian an ni a, ka nau hlui vek deuh tho an ni a, an ṭha tih ka hria. Kan inhnehtawk viau ang tih ka ring. Chutihrualin chhiatna lai an nei a, chu chu kan hman thiam chuan kan chak ang," tiin BVT beiseina an tihtawp theih thu a sawi.

Armed Veng hian Lalramchullova an kawl a, Aizawl FC defender hlui Lammualah a la vul hle. BS-a Colney hian tawnhriat nei ṭha captain F. Lalmuanpuia (Koto-a) leh Zodingliana (Adinga) a la nei a, anni pahnih hi phai lama che tla an nih avangin MPL chauh thlir tan chuan mi thar an ni a, tualchhung football thuk taka hre chin chuan an thiamzia an hre vek.

Vawi nga champion tawh team hian tlarhmaah Mizoram Police forward Lalfakzuala an kawl a, mual sirah winger tlanchak Lalmuanzova leh thluak ṭha Lalbiakhlua (Hlutea) te an awm a, heng player ṭha chawmtute hi an ṭhat bawk avangin Armed Vengin semifinal thleng tura goal 21 an khung tawh hi a mak lo.

Armed Veng tlarhnung pawh hi statistics aṭanga thlir chuan a ṭha a, Zawlnuam Bawrai lakah chauh goal an la chhuah. Chutihrualin zirchian deuh chuan BS-a Colney hote chak lohna lai chu tlarhnung lam hi a ni. BVT lam hian match hnuhnung pathumah goal chhuah vek mah se tlarhnung erawh an nei ṭha. MPL best defender ni lai PC Laldinpuia hoin Jonathan Lalhriatkima, Hmingthanmawia leh K. Lalmalsawma te an awm a, keeper Lalmuansanga pawh Durtlang laka penalty vawi hnih a dan avangin a inringtawk khawp ang.

Tlarhma lamah Laldingngheta leh Lalrammawia te an kawl a, hemite chawm tur hian captain K. Lalṭhathanga a awm. BVT hian hun rei tak chhung an veng naupang an chher tawh avangin tawnhriat nei tlem deuha nia langte pawh an rintlak hlawm hle.

Tun thlenga Hnahthial an la dam hi an vanneih vang a ni lo a, an ṭhat vang a ni. Aizawl khaw pawn aṭanga la dam awmchhun hian player ṭha an kawl avangin an khingpui tur team ṭha Chanmari nen an inbuk tawk hle.

Hnahthial manager C. Lalramdinsanga (RD-a) chuan, "Kan thlen chin a ropui tawh lutuk. Kan khelh chhiat niah pawh vanneihna kan chang. Pathianin kan player-te tumruhna min hriatsak a. Chanmari lakah a vannei zawk kan nih ngei kan beisei," tiin Vanglaini a hrilh a, an thlenna Republic Veng mipui ṭawiawmna a beisei thu a sawi tel bawk.

Hnahthial hian talent nei ṭha rual Isaac Vanmalsawma, Jeremy Laldinpuia leh Jakob Vanlalhlimpuia te an kawl a, tlarhnungah veteran defender R. Vanlalpeka'n a ho thei bawk. Hnahthial mipui an ṭangrual a, Mizo zinga thleng sang ber Jeje Lalpekhlua pawhin inkhelh ni chauh ni loah pawh an khaw team hi a ho ṭha hle.

Chanmari hian kil tinah player ṭha an kawl ve bawk a, tlarhnungah Lalrinchhana Tochhawng leh Lalhriatrenga (Achia) te an awm a, midfield-ah Rochhingpuia awmin tlarhmaah Jerry Mawihmingthanga a awm. Coach Samuel Lalrinzuala Sailo chuan, "Hnahthial hi team ṭha tak an ni a, naupang hmabak nei êng tak tak an ni. Chutihrualin kan team hi kan ṭha a, chak zawk tur erawh sawi lawk theih a ni lo," tiin a sawi.

MPL club nei veng Chanmari hian an veng mipui aṭangin thlawpna an hmu ṭha a, NGO hrang hrang an ṭanrual bawk avangin ṭantu nei ṭha viau tura ngaih an ni.

 SF1    Armed Veng    12:00 PM    Bethlehem Vengthlang

 SF2    Hnahthial Joint    02:00 PM    Chanmari

Final - July 20, Inrinni - 3:00 PM

Semifinal Kalkawng

Armed Veng

Armed Veng 2 - 0 Zonuam

ARM : R.Lalhriatzuala 51'; Lalbiakhlua 74'

Rengtekawn 0 - 8 Armed Veng

ARM : Lalfakzuala 2' 71'; Lalbiakhlua 11', 65'; 

   R. Lalhriatzuala 17'; Vanlalnghaka 20' (OG); 

   F. Lalmuanpuia 56'; Zodingliana Tochhawng 64'

College Veng 0 - 1 Armed Veng

ARM : Lalbiakhlua 88' (P)

Armed Veng 7 - 2 Zawlnuam Bawrai

ARM : Lalbiakhlua 5'; Lalawmpuia Hnamte 11', 12'; 

   Lalmuanzova 17'; R Lalawmpuia 29' (OG); 

   Lalfakzuala 31', 74'

ZAW : Lalhmingchhuanga 54'; Vanlalhruaitluanga 90+2'

MoM : Lalbiakhlua, Armed Veng

Republic Veng 0 - 3 Armed Veng

ARM : Lalawmpuia 27'; Lalfakzuala 79', 87'

MoM: F. Lalmuanpuia,  Armed Veng

Bethlehem Vengthlang

Bethlehem Vengthlang 6 - 0 Ramhlun Sports Complex

BVT : C.Vanlalhmangaiha 23'; Lalruatkima 27'; 

   PC. Laldinpuia 30'; Lalrammawia 51'; 

   Laldingngheta 71'; Lalremsanga 90'

Sairang 0 - 10 Bethlehem Vengthlang

BVT : Jonathan H Lalhriatkima 4'; Lalrammawia 7', 12', 40'; 

  Zothanpuia Hnamte 20'; Zaithanmawia 51'; 

  C. Lalrintluanga 58'; Laldingngheta 66', 86'; 

  Lalremsanga 79'

Chaltlang 2 - 6 Bethlehem Vengthlang

CHA : Lalthanmawia 19'; Malsawmzuala 29'

BVT : Laldingngheta 14', 22'; C.Lalmuanawma 47' (OG); 

   Lalrammawia 56', 80'; Zaithanmawia 87'

Bethlehem Vengthlang 3 - 1 Bawngkawn

BVT : K. Lalṭhathanga 32'; Lalrammawia 34'; 

   Laldingngheta 76'

BAW : MS Dawngliana 55' (P) 

MoM: K. Lalthathanga, BVT

Durtlang 1-1 Bethlehem Vengthlang

Penalty Shootout-ah BVT 4-2 in an chak

DUR : Lalchungnunga 90+4'

BVT : Lalrammawia 24'

MoM : Lalrammawia, BVT

Hnahthial Joint

Hnahthial Joint 6 - 3 Tlungvel Venghlun

HNA : Isaac Vanmalsawma 42'; Jeremy Laldinpuia 54'; 

   Jakob Lalhlimpuia 74'; Malsawmsanga 81'; 

   Lalrintluanga 83'

Hnahthial Joint 3 - 2 Venghlui

HNA : Lalrintluanga18'; Jakob Vanlalhlimpuia 20'; 

   K.Lalrinfela 78'

VEN : Isak Vanlalpeka 42'; Lalthankhuma 89'

Hnahthial Joint 4 - 4 Lengpui

HNA : Jakob Vanlalhlimpuia 16';  Isaac Vanmalsawma 

   41', 57'; Ramdinthara 59'

LEN : Larry Lalrinawma 10', 47'; F. Lalremsanga 11'; 

   F.  Lalchhuanmawia 71'

MoM : Isaac Vanmalsawma, Hnathial

Hnahthial Joint 1 - 1 Salem Veng

Penalty Shootout-ah Hnahthial 4-2 in an chak

HNA : Jakob Vanlaldinpuia 20'

SAL : David. Lalchhuanawma 15'

MoM : K. Lalrinfela, Hnahthial

Chanmari

Chanmari 3 - 2 Zemabawk North

CHA : Rochhingpuia 70'; Lalremruata 83', 90+2'

ZEM : David Lalrinmuana 78'; 

    Malsawmtluanga Ralte 90+5'

Chanmari 4 - 0 Zotlang 

CHA : Lalremruata 53', 80',  88'; Rochhingpuia 78'

Chanmari 2 - 2 Khawzawl Joint

CHA : Lalhriatrenga 61'; Rosangliana 81'

KHA : B. Lalnunpuia 25'; Hmangaihtluanga 90+1'

Penalty Shootout-ah Chanmari 8-7 in an chak

MoM : V. Lalruatsanga, Chanmari

Chanmari 3 - 1 ITI Veng

CHA : Rosangliana 12'; V. Lalruatsanga 36'; 

   Rochhingpuia 71'

ITI : TC Lalhuapzauva 14'

MoM: Rochhingpuia,  Chanmari