Westbrook-a'n Rockets a pan

Houston Rockets general manager Daryl Morey chuan nimin khan Russell Westbrook chu Oklahoma City Thunder aṭanga an lakluh thu a puang a, an player Chris Paul chu Thunder lamah a kal ve thung.

Kum 30 mi Westbrook hi NBA player hmuhnawm leh ṭha berte zinga mi a ni a, All Star Team-ah vawi riat ngawt tel tawhin, season mala point score hnem ber pawh vawi hnih a ni tawh. Thunder general manager Sam Presti chuan, "Oklahoma City Thunder player awm tawh zinga pawimawh ber a ni a, team leh khawpui tan sulhnu ropui tak a hnutchhiah a ni," tiin kum 2017 NBA Most Valuable Player Westbrook thlahna thu a sawi.

American star hian Rockets-ah James Harden a zawm dawn a ni a, tun hnai season nga chhung MVP vote thlaka a sang zual 10 zinga tel char char thei pahnih an awm kawp dawn tak avangin season tharah champion an tum ngam ang.

Thunder chairman Clayton I Bennett pawhin a ui thu sawiin, "Oklahama chhungkaw tana a hlutna hi sawi nep theih a ni lo, a sulhnu hi a ropui em a ni. Club chuan kan hre reng tawh ang," a ti. Kumin April thla khan West-brook hian Los Angeles Lakers lakah triple-double (20 points, 20 rebounds leh 21 assists) a nei. NBA huangah Wilt Chamberlain leh Westbrook te chauh hi hetiang ti thei hi an la awm.