NorthEast United tan semifinal a hnai zel

Aizawl FC hmanga Indian football chanchin ngaihnawm ber pawl ziaktu Khalid Jamil-a chanchin a ngaihnawm zel - Indian coach enkawlna hnuaiah NorthEast United tan semifinal a hnai leh ta sawt. 

Thawhlehni zan khan Indian Super League-ah NorthEast United hian 2-1 in East Bengal an hneh a, Guwahati club tan semifinal lut turin match tawp bera Kerala Blasters inhnehtawkpui a tawk.

Highlander tan VP Suhair leh Sarthak Golui (own goal)-ten goal khat ve ve an khung a, Kolkata club tan Golui vekin goal hmangin a tihsual thup mah se awmzia erawh a nei phak tawh lo.

Semifinal lut turin FC Goa leh Hyderabad-ten beisei an la neih ve avangin NorthEast tan beisei tur nei tawh lo East Bengal lakah chak ngei ngei a ngai a, mahse, first half chhungin VP Suhair-a'n keeper Mirshad Michu-a enchhin tih loh chu team pahnih hian chance hlauhawm an nei meuh lo. 

Second half-ah erawh Highlander an nung sawt a, inkhel ṭan aṭanga minute thumna lekah Suhair chuan ṭha zetin goal hmahruai a khung - Kolkata club an insiamṭha lo. Nim Dorjee-a cross naran tak nia lang chu Golui-a'n pet nat a tum luatah an lamah a ti lut!

East Bengal tan Surchandra Singh-a shot ṭha tak chu goalkeeper Subhasish Roy-a'n a dansak a, minute 83-naa Golui-a ball tauh erawh a dang thei lo - East Bengal goal khung erawh a tlai hret a, a tawpah 2-1 in NorthEast United an chak. 

Mizo tlangval Jeje Lalpekhlua'n East Bengal jersey ha chungin inkhel bul a ṭan a, Mizo Sniper hming lem an pek striker hian a vanglai a pel ṭan ve ta niin a lang thung - khelmuala minute 78 hun a hman chhungin vawi khat chiah shot a nei a, target zawnah a kal lo. 

Jeje hian khup hliam vangin season hmasa tluan inkhel loin hun a hmang a, tun season ISL-ah pawh hliam dam kawr ni chungin season bul a ṭan. 

Hetiang boruak karah hian Hnahthial tlangval hian ngai a la awh lo tih a lang a, a tharum ngahna a la chhawr ṭha thei lo a, a goal bawh a la na tawk lo a, hetihrual hian ball ṭha a hmu tawk lo bawk. 

Robbie Fowler enkawlna hnuaiah Jeje hian hmun a chang meuh lo bawk a, hei vang hian inrintawkna a la tlachham niin a lang bawk - tun season-ah match ruk chiah a la khel a, goal khung nei loin assist vawi khat a nei. 

NorthEast United tan Lalengmawia'n inkhel bul a ṭan a, Vaivakawn rawlthar hian Deshorn Brown tan ball duhawm tak siamsak mah se Jamaican striker hian goal-ah a chantir thei lo. 

Brown hi inkhelh chhung zawngin a hnawksak a, minute 71-naa a hun ṭha neih duhawm tak chu Kolkata club defender Raju Gaikwad-a'n a dan theih dan ṭha bera a hriat hmangin a pawt thlu a, Gaikwad-a'n a yellow card pahnihna hmuin hnawhchhuah a nih phah. 

Lunglei tlangval Lalrempuia Fanai chu minute 73-naah luhtir a ni bawk a, tun dinhmuna ISL semifinal khel thei club zinga Mizoin hmun pawimawh an channa hmun chu NorthEast United hi a ni. 

Highlander-in an coach Gerard Nus an banin sawiselna an tawk nasa a, tunah erawh a sawiseltute an ngawi ta - Khalid Jamil an nei miau a!

Season ṭantira assistant coach, Nus nen an inhmuhthiam loh avanga match khat hnua an thawn haw nia sawi coach hian Spanish coach ban hnuah Highlander a enkawl a, semifinal khel thei dinhmunah an ding mek. 

Khalid-a hnuaiah NorthEast hian match riat khel tawhin tlawm an la nei lo a, vawi nga chakin vawi thum an draw - Highlander chanchina a vawi khat nan point 30 an hlawh chhuak a, semifinal an lut a nih chuan ISL-a a sang pali zinga an tel vawi hnihna a ni bawk ang. 

ISL club zingah ATK Mohun Bagan leh Mumbai City chu semifinal khel tura tling chiang tawh an ni a, hmun ruak dang pahnih hi Goa, NorthEast United leh Hyderabad-ten an inchuh dawn. 

NorthEast United vanneihna chu Goa leh Hyderabad hi match khat chauh khelh tur an neih tawhah an inhmachhawn dawn - Highlander hian Blasters an inhnehtawkpui chuan an tlang ang. 

February 26 zanah Highlander hian Kerala Blasters an hmachhawn dawn a, South Indian club lakah an tlawm a nih chuan February 28 zana FC Goa leh Hyderabad inkhel result an nghah phawt a ṭul ang. 

ISL-ah goal difference aiin head-to-head en hmasak ṭhin a ni. NorthEast United hi Blasters lakah chak lo ta se, Hyderabad-in Goa hneh ta se team pahnih hi an tlang daih ang.

Highlander leh Goa hi vawi hnih an intum tawhah an inhnehtawk ve ve a, hei vang hian tun dinhmuna goal difference ṭha zawk FC Goa chu point hmuh zat inanga tlang tur an ni. 

Khalid-a leh a naute hian chak lo pawh ni se tlang theih dan dang erawh an la nei tho - Hyderabad leh Goa hi an inhnehtawk chuan Goa nen an tlang daih thei. A tawi zawnga sawi chuan, NorthEast leh Goa tan tlang turin draw result-a tawk a, Hyderabad tan chak ngei ngei a ngai thung.