Tiger Woods a chesual

Golf khel thiam hmingthang Tiger Woods chu Thawhlehni khan Los Angeles-ah car in a chesual a, a keah hliam na tak a tuar. Nunna tana hlauhawm erawh a ni lo niin LA County Sheriff Alex Villanueva chuan a sawi.

Woods hi kawngpui aṭangin a tlan liam a, kawng thlangah lumin amah a insaseng thei lo. Kang ṭhelhtu leh chhanchhuah hna tawktuten an hruai chhuak a, damdawi inah hruai niin a ke ruh hi hmun hnih aia tamah a tliak tih an sawi chiang.

Harbor UCLA Medical Centre chief medical officer Anish Mahajan chuan, "A ruh a tliak a, heng bakah hian tihrawl thler a awm nual bawk avangin zai a ngai," tiin an damlo chungchang a sawi.

Kum 45 mi Woods hi golf a khelh thiam em avanga hriat hlawh a ni a, a hun hnuhnung lamah erawh harsatna a ngah. Hnungzâng na vangin zai a ni tawh a, a hliam bakah hian khelmual pawn lamah buaina dang a nei leh zauh ṭhin.

American star hi mi hrang hrangin dam leh thuai tura an duh thu an sawi. Boxer ropui Mike Tyson chuan, "Tiger Woods champion ropui i nihna ang khan ṭang fan fan rawh, i fate leh khawvel tan i dam a ngai. Kan ṭawngṭai pui che," a ti.

Major title 15 la tawh Woods hian 2019 kha world ranking-ah parukna ni chungin hun a khar a, tunah erawh ranking-ah hian 50-na dinhmun a luah thung.