Red Bull-in car thar tlangzarh

Formual 1 team ṭha Red Bull chuan season thara an car hman tur 'RB16B' an tlangzarh a, driver Max Verstappen chuan an car thar nen inelna ṭha tak an hman theih a beisei thu a sawi.

Car engine hi Honda siam a ni a, Japanese manufacturer hian F1 engine an siam hnuhnung ber tur a nih avangin kawng hrang hranga hmasawn an tum a, season hmasa lama an phak loh Mercedes pawh elphak ngei an tum.

Season hmasa khan Red Bull hi team championship-ah pahnihna an ni, an chungah hian Lewis Hamilton leh Valtteri Bottas te awmna Mercedes chuan ro an rel - kuminah hian anni team pahnih bakah Ferrari chu inel nasa leh tura ngaih an ni.

Inelna an neih hnuhnung ber Abu Dhabi Grand Prix a chak ber Verstappen hi season tharah champion zinkai zinga mi a ni dawn. Dutch tlangval hi Hamilton elphak ber tura ngaih a ni a, chutih rualin team lamin car ṭha leh chak an chhawp chhuahsak a ngai ve thung.