Bayern Munich-in Lazio an sawp

Champions League-ah champion lai Bayern Munich chuan Lazio chu an mual Stadio Olimpico, Rome-ah an luhchhuah a, 4-1 inhnehna an chang. Second leg hi March 17 zanah khelh a ni dawn a, Allianz Arena-ah khelh a ni thung ang.

Thawhlehni zan inkhelah hian Bayern tan Robert Lewandowski, Jamal Musiala leh Leroy Sane te first half-ah goal khat ṭheuh an khung. Second half ṭantirhah Lazio defender Francesco Acerbi-a'n an lamah a tilut a, Italian club tana Joaquin Correa khung chu a scoreline tih mawina chauh a ni.

Bayern Munich-in Covid-19 vangin Thomas Muller an chawr thei lo a, player pawimawh dang Serge Gnabry leh Benjamin Pavard te hliam vangin an chhawr thei lo.

Hansi Flick-a'n Lazio nen hian Muller aiah rawlthar Jamal Musiala a luhtir a, Germany leh England in an inchuh mek Musiala hi player hmuhnawm zingah a tel pha. Kartawpa Eintracht

Frankfurt an hneh loh ṭumin Muller-a position-ah hian Eric-Maxim Choupo-Moting chhawr a ni a, kum 31 mi ai hian Musiala hian Muller-a hmunruak a hnawh khat ṭha zawk.

Bayern hian Lazio laka inkhel an thunun theih nan na takin an nawr tawm (pressing) a, an passing a ṭha a, an awmna (positioning) a dik bawk. Heng zawng zawngah hian kum 17 mi Musiala hian a tih tur a ti ṭha hle.

Musiala han a ball pet thiamna leh khalh thiamna hmangin Lazio tlarhnung a ṭhiat a, ama pualin goal a nei bawk. Minute 24-naah Musiala hian box chhung aṭangin ṭha zetin goal a khung a ni.

Musiala-a'n fak a hlawh chhan chu a la naupang vang leh beisei phak baka a chet ṭhat vang a ni. Bayern striker Robert Lewandowski erawh beisei a sang chungin beisei a pha zel a, Polish striker hi goal nen a sawi kawp theih zel.

Lazio lakah pawh hian Lewy hi a bul ṭantu a ni a, minute kuana lekah keeper Pepe Reina bumin goal hmahruai a khung. Bavarians tan hian Leroy Sane a che ṭha bawk. Man City aṭanga Bayern zawmtu Sane hian minute 42-naah goal a khung a, minute 47-naah a cross chu Acerbi-a'n an lamah a ti lut.

Benjamin Pavard inhliam vangin Niklas Sule chu right back-ah dah a ni a, defence laia sawisel hlawh German defender hian a hna thar hi a tlin hle. Lazio nen hian Sule hian vawi li 'dribble' a nei a, a hlawhtling vek.

Sule hian Hoffenheim a khelh laiin Mizoram an rawn tlawh tawh a, Lammualah ball a khalh theih zia a pholangin tlarhnung aṭangin chak takin a khalh chhuak. German defender hian Hansi Flick-a mit a tlung a nih chuan Bayern-ah hmun rei zawk a la awm thei ang.

Bundesliga-a match hnih chak hmel hmu tawh lo, Bayern tan lawmna tur dang a awm. Leon Goretzka a rawn kir leh tawh a, tlarhnung pui tura Goretzka awm hian duh thalin Joshua Kimmich a khelh theih phah a ni.

Bayern manager Hansi Flick chuan, "Player tinin beisei an pha vek a, kan khingpuite tibuai turin pressure kan pe a, kan hlawhtling. Lazio goal hnaihah ball kan chhuhsak tam avangin goal chance pawh kan ngah phah a ni," tiin an khelh danah a lawm hle.

Lazio manager Simone Inzaghi chuan, "Bayern hi world champion ni lai an ni a, khawvela ṭha ber ang hialah an chhal theih. An ṭhat avangin anmahni puihna turin kan chesual an mamawh lo a, amaherawhchu kan chetsual si avangin awlsam takin an chak a ni," tiin a sawi.