Arsenal insiksawi dawn

Mikel Arteta chuan Arsenal leh Benfica tan Europa League last 32 second leg an khelh turah player siksawi a tum a, chak tlang ngei turin player tha za rual an luh tur thu a sawi chhuak.

Gunners leh Benfica te hi an intawn hmasakah 1-1 in an inhnehtawk. Zanin dar 11:25 hian Emirates Stadium-ah second leg an khel dawn, goal a lut lo a nih chuan Arteta naute an tlang ang, goal venhim tum ngawt ai chuan khung belh tum a fin thlakin a rinawm.

Spanish manager Arteta chuan, "Insiam thar kan ngai, match hautak kan khel zo chauh a, kan hmabakah a la awm bawk. Player thlak kual zat tur ka sawi chiang thei lo, chutih rualin tute nge rilru engthawl leh thatho taka khel thei tih kan enfiah ang.

"Match kan ngah avangin player zawng zawng hi inkhel turin inpeih se tih hi ka duhthusam a ni, inkhelh ngei duhin player ten theihtawp an chhuah vek a, hei hian min ti lawm hle," tiin a sawi.

Gunners hian Premier League match an khelh hnuhnung berah Manchester City an ngam lo, tun kar tawpah an chunga awm Leicester City an lenchilh zui leh nghal dawn avangin an hmabak a hautak hle.

Man City laka inlan thei lo Thomas Partey chuan training a zawm pangngai leh tawh a, beiseina sang tak nena an lakluh Ghanaian midfielder Partey hian Benfica lakah inkhel bul a ṭan thei tura beisei a ni.

EPL table laihawla awm Arsenal tan league aṭanga chuan European football khelh beiseina a tlem tawh, season tharah club ṭha inelna huanga tel chhunzawm an duh a nih chuan Europa League-a hlawhtlin hi kawng an neih awmchhun a nih tawh avangin theihtawp an chhuah a ngai dawn.