Man United hmabak a awlsam

Manchester United-in zanin dar 1:30 hian Old Trafford-ah Real Sociedad an hmachhawn dawn a, first leg-ah Ole Gunnar Solskjaer hote hi 4-0 a an chak tawh avangin hmabak a awlsam tura ngaih a ni.

Norwegian manager Solskjaer hnuaiah player naupang zawk Amad Diallo leh Shola Shoretire ten khelhna hun an nei tawh a, Sociedad lakah hian khelhna hun tam zawk an nei thei ang em tih hriat a châkawm hle.

Amaherawhchu English club hian Spanish club hi an zuam ngawt a fuh lo, Real Sociedad hian kartawp khan Alaves 4-0 in an sawp. David Silva telna team hian 'flag var' vai chungin Old Trafford an pan mai dawn lo a, Solskjaer-a'n fimkhur takin player a thlan tho a ṭul ang.

Chutihrualin Pathianni zan hian Man United-in Thomas Tuchel-a hnuaia hartharna chang Chelsea hmachhawn turin Stamford Bridge-ah an lenglut dawn a, Sociedad nen hian player ṭha ṭhenkhat an awl ngei a rinawm.

Europa League a nih avangin keeper Dean Henderson chu lut chiang tura ngaih a ni a, tawnhriat nei ṭha player Nemanja Matic, Juan Mata leh Brandon Williams te pawh khelhna hun an neih theih a beiseiawm.

Captain Harry Maguire-a'n yellow card a hmu leh a nih chuan hrem a tawk thei tawh a, chuvangin English defender hi hahchawlhna hun a neih theih a beiseiawm. Maguire a awm lo a nih chuan Eric Bailly leh Axel Tuanzebe te an inkawp thei ang. 

Man United tan inhliam vangin Paul Pogba leh Phil Jones te an la inlan thei dawn lo chiang a, Scott McTominay, Edinson Cavani leh Donny van de Beek te erawh match fitness nei leh turin khelhna hun a nei thei bawk ang.