Celtic manager Lennon a bang

Scottish Premiership-ah Celtic-in hmahruaitu Rangers point 18-in an pha lo a, manager Neil Lennon a bang. Team enkawl turin assistant manager John Kennedy chu ruat lailawk a ni.

Celtic hi Scottish Premiership-ah pahnihnaah awm mah se pakhatna Rangers chu point 18 ngawtin an pha lo. 

Kum 49 mi Lennon hian 2018-19 leh 2019-20 season khan inelna thunun chungin Scottish Premiership-ah Celtic a champion pui a, tun season-ah erawh Steven Gerrard-a kaihhruai Rangers an pha lo hle.

Lennon chuan, "Hun harsa tak kan tawng a, tun hmaa kan tih ang ṭhin kha kan ti thei lo. Kan dinhmun thlak danglam turin theihtawp ka chhuah a, kan tih theih tak si loah chuan ka chhuah a ngai ta a ni.

"Celtic tan hian ka theihna zawng zawng ka hlan ṭhin a, club ṭantu ka ni chhunzawm zel dawn a, club tana ṭha ber hi ka duh dan a ni," tiin a sawi.

Northern Ireland international hlui Lennon hian Celtic hi player a nih laiin league-ah vawi nga a champion pui a, manager a nih hnuah vawi nga tho a champion pui leh a ni.

Celtic pawhin an captain hlui Lennon hi player leh manager anga a hnathawh chu a ṭhat chungchuang thu an sawi a, an kal zelna turah duhsakna an hlan bawk.