Bamford-a'n Leeds a chakpui

Leeds United-in Thawhlehni zan Premier League inkhelah Southampton 3-0 in an hneh. Elland Road-a inkhel hmuhnawm takah hian first half-ah goal  lut lo a, second half-ah Leeds tan Patrick Bamford, Stuart Dallas leh Raphinha ten goal khat ṭheuh an khung.

Marcelo Bielsa hote hian point thum an hlawhchhuah avangin point 35 an hmu a, table-ah 10-naah invawrhchhoin Arsenal chungah an awm. Saints erawh point 30 hmuin 14-naah an awm chhunzawm thung.

First half-ah goal a lut lo chungin thil thleng erawh a tam. Nathan Tella-a'n Leeds defender Diego Llorente lakah penalty a hlawh chhuak a, amaherawhchu VAR hmanga en let a nih hnuah referee Andre Marriner-a'n thutlukna a sut.

Saints hian freekick rang taka petin Che Adams-a'n goal-ah a chantir a, amaherawhchu referee Marriner-a'n a pawmsak lo. First half-ah hian Leeds pawhin chanve an nei ve tho a, Raphinha goal khung tur chu box chhungah Oriol Romeu-a'n a tackle hman.

Second half ṭan chiahah Tyler Roberts through ball fing tak chu Patrick Bamford-a'n um lutin ṭha takin minute 47-naah goal hmahruai a khung. 

Kum 27 mi English striker hian tun season Premier League-ah goal 13 a khung tawh a, Leeds United-a amah hnaih bertu ber Jack Harrison (goal ruk) aiin a letin a khung tam zawk.

Minute 78-naah Stuart Dallas-a'n fing takin box chung aṭangin a pet goal a, minute 84-naah Raphinha-a'n freekick aṭangin ṭha zetin a khung leh bawk.

Kar liam ta khan Kalvin Phillips-a pi Val a thi a, ani hi Amazon-a Leeds United documentary 'Take Us Home'-ah pawh khan a lang. Saints nena an hnehna chan hi Leeds player-ten Val tan hian an hlan.

Leeds manager Marcelo Bielsa  chuan, "Goal thumin kan chak a, chak phuah inngai mah ila awlsam takin hnehna kan chang lo. Kan inhnehtawk avangin goal khung hmasak kha a pawimawh a, anni pawhin chance an insiam hnem a, mahse anni aiin a letin chance kan insiam hnem a ni," tiin chak an phu zawk thu a sawi.

Southampton manager Ralph Hasenhuttl chuan, "First half kan khel ṭha a, second half-ah erawh kan khel chhia. Second half-a kan khelh dan avang khan Leeds khan chak an phu zawk a ni," tiin a sawi.