Football tan chawlh rih a ngai - Walker
Manchester City defender Kyle Walker chuan Premier League season kal lai an khelh chhunzawm leh theih a beisei a, chutih rualin tun dinhmunah chuan player leh fans zawng zawng tan ina awm chu thil ṭha ber a nih thu a sawi.
Covid-19 vangin infiamna khawvel chu a chawl ṭhuap rih a, football inelna ngaihhlut EPL pawh an chawl lailawk mak. Man City hian an league nomawi kawl lai chu Liverpool laka chan mai thei dinhmunah an ding mek.
England international Walker chuan, "Tun dinhmunah chuan football hi a chawlh rih a ngai, hei hi kan zavaia ṭhat tlanna tur zawk a ni. Mimal bakah chhungkua leh khawtlang damna leh hriselna hi a pawimawh.
"Chawlh rih a ṭha ka tih vangin hian season khelh chhunzawm loh ka thlawp tihna erawh a ni lo. Engtik niah emaw chuan league pawh tluang takin kan khelh chhunzawm leh ka beisei, amaherawhchu kan khel zawm thei lo a nih pawhin pawm thiam a ngai ang," a ti.