Mino Raiola titi Haaland & Pogba chungchang a sawi chhuak

Football agent lar, 'Super-agent' tih hiala tam takin an koh Mino Raiola a ṭawng chhuak leh ta a, a player Erling Braut Haaland leh Paul Pogba piah lamah FIFA thlengin a sawi ri leh tawh. 

Khawvela football star lar ber ber enkawltu agent hi tam tak chuan player kaltlanga a hausakna avang hian an dem a, hawtu pawh a ngah hle - mahse, Raiola ti nghing meuh tur chuan an nem mah mah. 

Kum 53 mi agent hian tun hnaia football agent ho tana dan thar duangtu FIFA a bei zui nghal zat a, court-a an kal tur thu thlengin a sawi leh piap piap tawh - inhmuam up a tum lo!

Covid-19 hri leng avangin European football club lianten a maktaduai telin sum an hloh a, mi tam tak chuan hei hian player hlawh leh transfer fee-ah thui tak nghawng a neih theih an ring. 

Mahse, Raiola chuan,"Buaina tur awmin kei chuan ka hre lo a, talent ṭha bik tan chuan engtiklai pawhin hmun a awm reng a ni," a ti a, he thu a sawi chhan hi kum 20 mi, a striker Haaland vang a ni - Borussia Dortmund striker hian tun season inelna hrang hrangah match 25 khelin goal 27-a khung tawh a, assist vawi sarih a nei. 

Raiola chuan, "Mi zawng zawngin Erling hi khawvela footballer ropui ni tur hmuhin an hmu vek a, a kum ang zata level sang taka a hnathawh hi a namai lo hle. Kum 10 vel lo awm leh turah hian star ropui tak a ni dawn - Ibrahimovic, Ronaldo leh Messi-te an upa ṭan ve ta a, an hmun ruak luah tur hi mipuiin an zawng reng. 

"Haaland lei thei tur hi club 10 chauh an awm a, chung zinga club pali chu English club an ni. Khawvela sports director emaw trainer zingah Erling duh lo an awm ka ring lo. Formula 1 team tana Lewis Hamilton duh loh ang chauh a ni ang," a ti a, Norwegian striker chu Covid-19 hri leng karah pawh a man a to tur thu a sawi. 

December khan Manchester United-in Champions League match pawimawh takah RB Leipzig an hmachhawn dawn a, match pawimawh an neih hma lawk hian Raiola chuan Paul Pogba tana United chhuahsan a ṭul thu a sawi!

Dutch-Italian agent thusawi 'hun' avang hian fans tam tak an lawm lo a, Pogba thlenga chhuak tura duhtu an awm phah. Mahse, Raiola chuan, "Ka ngaihdan ka sawi ve a ni mai a, eng buaina mah siam ka duh lo.

"Ka thusawi khan mi a tihbuai pawh ka ring lo. Kha ka thusawi avang khan player langsar Paul Pogba emaw Ole Gunnar Solskjaer-te ang, nomawi chawi theih zawng zawng chawi hi an talbuai ang maw? A teuh lo mai," a ti.

Belgium striker Romelu Lukaku, Italy forward Mario Balotelli leh Netherlands centre back Matthijs de Ligt-te pawh enkawltu Raiola hi coach langsar Sir Alex Ferguson, Pep Guardiola leh Jurgen Klopp-te pawhin an lo sawisel tawh. 

Kum 2016 khan Pogba-a'n Juventus aṭangin Manchester United a zawm a, hetihlaia a man zat hi pound maktaduai 89 a ni - Raiola hian he inremnaah hian pound maktaduai 41 lai hlawkna a tel nia sawi a ni hial. 

Raiola chuan, "Thudik tak hriat hmaa mi ngaihdan satliah hriat hi thil ninawm tak a ni. Mipui chuan ngaihdan an lo nei ve a ni mai thei a, a pawimawh ber erawh ka hnathawhah ka player-te an lawm em? tih hi a ni. 

"Mi ngaihdan hian min tibuai lo anga ka sawi dawn a nih chuan dawt sawi ka ni ang. Mahse, engtinnge Ibra tana agent ṭha ka nih leh nih loh miin an hriat theih? Hemi chungchang sawi tur chu Ibra a ni. 

"Mi thil tithei tak pawh ka ni hran lo a, ka hna chu ka player-te tana a ṭha thei ang bera thawh hi a ni mai. Player tana hnathawhsak tur hi tam tak a awm a, heng zingah hian mipuiin an hriat kher loh hna thlengin a awm," a ti a, a player-te an lawm chuan a tan a tawk thu a sawi bawk.

Football khawvela thuneitu sang ber FIFA chuan nikum khan kumin aṭanga hman ṭan turin agent-te tan dan thar a duang a, heng zingah hian agent-te sum dawn zat puanzar te, comission aṭanga dawn theih chin siam te, licensing system leh agent-ten uchuak taka sum an lak ṭhin tihhniamna te a awm. 

Mahse, agent langsar-te leh an player-te puala pawl siam Football Forum president Raiola chuan, "FIFA hi kan be tawh dawn lo a, ka ngaihdanah chuan court-ah kan inhmuh a ngaih ka ring," a ti a, FIFA a cho hle. 

Raiola chuan, "Kan sum lakluhna tihlan hi pawi ka ti hauh lo a, mahse, chutiang hna thawk tur chuan sorkar a awm a ni. Football khawvel hi thlak danglam a ngai ka ti a, mahse, kan tel ve a ṭul a ni. Kan ṭha famkim e, ka ti lo a, mahse, FIFA-in a duhdan anga a tih ngawt theih a ni bik lo," a ti. 

Hetihlai hian FIFA chuan he dan thar siam tur hian uluk taka an thlir thu an sawi ve bawk a, kum 2015-a agent-te an lo thlah zalen lutuk chu an tihsual a nih thu an sawi bawk - season hmasa khan Premier League club-ten agent hlawha an sen chu pound maktaduai 263-a tling!

Premier League hnuaia league Championship, League One leh League Two-te hi English Football League tia hriat an ni a, EFL hian League One leh League Two bikah hian player-te hlawha sen theih zat an bituk. 

Mahse, Professional Footballers' Association-in hma an lak hnuah tun thlatir khan hlawh zat bituk hi tih bo a ni a, hei hi Raiola chuan a thlawp thu a sawi.

Kum 53 mi Raiola chuan, "Company a lian emaw, a te emaw, a enkawltu CEO-te hlawh zat bithliah a ni ngai lo a, engvangin nge player-te tan bithliah a nih bik ang?" a ti a, player-te lam a ṭan thu a sawi lang bawk. 

Raiola hian football club-te sum lama an nghehna tur buaipui a pawimawh thu a sawi bawk a, hemi kawnga football club-te thawhpui tura an pawl Football Forum an awm reng thu a sawi lang bawk a ni.