Chelsea chakna Giroud goal mawi

Team pakhat chuan football mawi khelh an duh a, pakhat zawk chuan mahni inveng chunga goal khung keuh an tum thung. Ball chang hnem Chelsea chuan tlarhnung remphui thiam Atletico Madrid chu Olivier Giroud-a goal mawi hmangin 1-0 in an hneh.

Thawhlehni zan Champions League last 16 first leg inkhelah Thomas Tuchel enkawl Blues chuan manager rorum Diego Simeone naute an dangchat thei a, quarterfinal lut turin an dinhmun a ṭha - March 18, Nilaini zanah second leg an khel leh dawn.

Covid-19 inkaihhruaina dan avangin Atletico Madrid khelmual Wanda Metropolitano Stadium-ah an inkhel thei lo. National Arena, Bucharest-ah an intawng, German manager Tuchel-a'n a naute goal bawh nat tir viau mah se Atletico tlarhnung an nghing duh lo.

Goal a lut dawn lo niin a lang hman, minute 68-naah Atletico defender Mario Hermoso chuan Kai Havertz nen ball lak an inchuh chu a ti pial kang luah a, ball kang naran nia lang hi striker Giroud chuan boruaka invawrh chungin goal kilah a bin (overhead kick) a, keeper ṭha mi Jan Oblak tan dan theih a ni lo.

France international Giroud hi offside nia ngaiin an hnawlsak a, mahse video assistant referee (VAR) hmanga ennawn a nih hnuah a offside lo. Goal dang lut loin khualmualah Chelsea an chak, 2013-14 season hnua a vawi khat nan UCL quarterfinal luh ngei an beisei.

Kum 34 mi Giroud chungchang sawiin Tuchel chuan, "Ni tina a training lai hmutu tan chuan a thil tih kha a mak hran lo. Kum 20 mi bawr vel chauh angin training a la nei thei a, a taksa a fit ṭha em em bawk. A eng lama thil thlir mi a ni a, team tana mi ṭangkai a ni," tiin a fak.

Frank Lampard thlaktu Tuchel-a'n danglamna a thlen zel a, manager thar kaihhruaina hnuaiah hian match riat khel tawhin chak loh an la nei lo. La Liga hmahruaitu lakah rinkai zawk an ni lo, mahse an thil tumah an chian avangin an chak niin a lang.

Inelna dangah Giroud a chhawr ngai meuh lo, mahse Champions League-ah erawh a chungah rinna a nghat ngam. Group match zawng zawnga goal khungtu hian amah ringtu rinna a ti thlawn lo - Arsenal striker hlui hian Sevilla leh Rennes lakah chakna goal pawimawh a lo khung tawh bawk.

Ball sem thiam Jorginho a rintlak a, rawlthar Callum Hudson-Odoi a hmuhnawm bawk - England forward hian goal khung lo mah se Atletico tlarhnung a chhaih buai fo, kum 22 mi Mason Mount pawhin Blues tana khelh a phu tih a lantir zel.

Chelsea manager Tuchel chuan, "Goal ropui hmangin result ṭha tak kan nei. Ball chang hnem chunga nawr tawm kha kan thil tum a ni a, player ten an tih tur ṭha taka an tih vek bakah an thawkrim. A nihna takah chuan Atletico tlarhnung sut hawn tum hi chu chona hautak a tling," a ti.

Spanish La Liga-ah Real Madrid leh Barcelona tlan pelin hma an hruai mek a, team nem zawk tura ngaih Chelsea lakah goal hlauhawm an nei thei lo. Luis Suarez awmna team hian quarterfinal lut tur chuan goal khung ngei ngei an mamawh tawh dawn.

Barcelona striker hlui Suarez-a'n hun ṭha nei mah se goal zawnah a pet thei lo, rawlthar duhawm Joao Felix pawhin 'overhead kick' hmanga khung tum ve mah se goal bar chungah a thlawh chhuak, minute 90 chhungin 'shot on target' an nei lo!

Simeone chuan, "Kan khingpuite kha an che rangin an tlan chak hle, player ṭha tak tak an ni hlawm, a bik takin midang tih theih loh ti thei Giroud an nei kha an vannei tel bawk. Second leg kan khelh tur hi a la hlat avangin sawi lawk vak a har.

"Ball chan hnem a pawimawhzia kan zir chhuak, a pawimawh ber chu thawhrim chhunzawm a ni. Tunah chak lo mah ila kan tla tihna a la ni lo, tho chhuak leh turin ka naute hi ka ringtawk hle," tiin a sawi.

*Roberto Di Matteo leh Guus Hiddink te hnung zuiin Thomas Tuchel chu Chelsea manager zingah Champions League match hmasa bera hnehna chang thei a ni.

*Juventus (March, 2019) hnuah, Atletico hian Champions League bika an match khelhah goal zawna pet an neih loh lehna hmasa ber an tawng.

*Olivier Giroud -a'n tun season UCL-ah goal ruk a khung ta. Kum 34 leh ni 146 mi niiin, Chelsea player zingah UCL knockout stage china goal khung thei upa ber a ni.

*Chelsea keeper Edouard Mendy chu tun season UCL bika clean sheet nei hnem ber (5) a ni.

*Mason Mount-a'n second 55-na lekah yellow card a hmu, tun season UCL-a card hmu rang ber a ni hial.

*Ronald Koeman 2007-08 (PSV leh Valencia) bakah Thomas Tuchel (Chelsea leh PSG) hi season khat chhunga UCL-ah team pahnih kaihruai thei a ni.