Ceballos hma hun a chiang lo
Real Madrid aṭanga loan hmanga Arsenal zawmtu Dani Ceballos chuan a hma hun a chian loh thu a sawi a, eng team tan pawh khel se player pawimawh nih phak a duh thu a sawi bawk.
Spain midfielder Ceballos hian season khat chhung atan Gunners hi a zawm a, an inrem dan chuan June 30 hian Emirates Stadium lama a hun chu a hmang zo ang, North London club hian an la nghet a nih loh chuan Spain lamah a kir leh ang.
Kum 23 mi Ceballos chuan, "Arsenal tana ka contract neih lai hi zo mah se khelh chhunzawm rih a ngai a nih chuan ka khel chhunzawm mai ang, hri leng vangin kan chawl mek a, hei hian inremna hmasa anga kan kalna tur kawng a dal rih a ni.
"Arsenal tana player pawimawh nih phak turin ka rawn kal a, mahse beisei ka neih san chhoh lai takin coronavirus vangin buaina kan tawk. Ka awmna tur chu khawi club pawh ni se mi ṭangkai nih ka duh," a ti.
A hma hun chungchang sawi zuiin Ceballos chuan, "Valencia-in min ngaihven tih ka hria, La Liga club dang Sevilla leh Real Betis te pawhin sawi rik an nei bawk. Betis hi chu tun hma lama hun ṭha min siamsak tawhtu an ni. Sevilla lam nen erawh mimala inbiakna kan la nei lo," a ti.