Anfield-ah Bayern an leng dawn

Champions League last 16-a mipui ngaihven hlawh ber zinga chhal ngam chu zanin dar 1:30 hian khelh a ni dawn a, Liverpool khelmualah Bayern Munich an lenglut dawn. 

Liverpool-in Premier League-ah season duhawm tak hmang mah se an ṭhat dan berin Bayern Munich hi an hmachhawn thei dawn lo a, hei tak hi Reds fan-te ti hlauthawng tu tur a ni ang. 

Hetihrual hian Bayern Munich hian season duhawm tak an hmang bik lo. Bundesliga-ah pahnihna dinhmun luah mekin tun season-ah vawi hnih an tlawm fel der tawh. 

Liverpool hian Bayern hmachhawn hun tur hi duh thlang thei ni ngat se, tun hnai kum nga chhungin tun season hi tum an chakawm ber ṭum a ni hial ang. 

FA Cup lamah Liverpool an tla hma hlauh a, hei hi Bayern lakah an vanneih phahna a ni thei - kartawp FA Cup-ah match an nei ve lo a, kar khat chuang zet Bayern an hmachhawn hmain chawlh hahdamna hun an nei. 

Bayern erawh Inrinni zan khan league match an khel a, an mikhualna ramah Augsburg chu 3-2 in an hneh hram - Bundesliga nomawi chawi an la beisei avangin player ṭha bench-ah dah a rem lo a, England-ah an zin zui dawn avangin an chau dawn tih a chiang. 

Hei mai hi a la ni lo cheu. Bayern hian Thomas Muller chu hrem vangin Liverpool an hmachhawn match hnihah an chhawr thei dawn lo a, Reds tlarhnung tan thawk huaina tham a ni. 

Champions League match 107-a khelh aṭanga goal 42 khungtu hian group stage-a Ajax nen 3-3 a an inhnehtawk ṭumin Nicolas Tagliafico chu a lu-ah a kein a tlawh a, match hnih khel thei lo tur hian hrem a nih phah a, Liverpool tan lawmna a ni. 

Liverpool hian an duhthusam ang takin Bayern hi an hmachhawn dawn tihna erawh a ni bik lo - tlarhnungah an defender rinrawl leh pawimawh Virgil van Dijk chu hrem vangin a inlan thei dawn lo. 

He thu buatsaih a nih lai hian Dejan Lovren dinhmun a la chiang lo a, Joe Gomez a inhliam bawk. Chumi awmzia chu Liverpool hian tlarhnungah phuahchawp takin Joel Matip leh Fabinho an inkawp tir a ngai dawn tihna a ni.

Bayern tan tlarhmaah Robert Lewan-dowski a la awm reng a, Polish striker hian tun season-ah goal 25 a khung tling leh der tawh - tlarhnung phuahchawp tur Liverpool tan dan a harsa ang. 

Augsburg laka goal hnih a khung hnua inhliam Kingsley Coman chu Liverpool hmachhawn turin a dam hman a, Franck Ribery leh Arjen Robben an la nei cheu bawk. 

Liverpool-in tlarhmaah player chhuan-vawr pathum Sadio Mane, Mohamed Salah leh Roberto Firmino te an nei a, European football-ah anni pathum tluka tlarhma hmachhawn chakawm loh an awm bik lo. 

Salah hian tun season-ah goal 20 a khung tling leh der tawh a, Mane hian goal 13 khungin Firmino hian goal 11 a khung tawh thung - player pathum hi season hmasa Champions League-a goal 10 ṭheuh khung thei vek kha an ni!

Bayern tlarhnung tan hna a awlsam dawn lo tihna a ni a, a bik takin tun hnaia an khelh dan enin a harsa lehzual ang. German club tan tlarhnung laia inkawp Mats Hummels leh Niklas Sule-te an 'form' loh lai tak a ni a, Bayern hian kum 2019-ah clean sheet an la nei miah lo. 

Hetihlai hian Bayern tlarhnung zinga 'form' awmchhun ang hiala sawi theih Joshua Kimmich hian tun season-ah ringawt assist vawi 12 a nei tawh a, German right back hi mual vei lam sira awm ṭhin Sadio Mane nena an inhmachhawn tur hi hmuh a chakawm hle - Senegalese forward hian a match hnuhnung pali-ah goal a khung vek.