Super Sub Daniel Lalhlimpuia

Mizo tlangval Daniel Lalhlimpuia'n Pathianni zan Indian Super League-ah goal hnih a khung a, bench aṭanga tlan lutin Bengaluru nena inhnehtawk mek a team Delhi Dynamos chu 3-2 in hnehna a chanpui. 

Delhi khawpuia inkhelah mualneitu team hian minute kuana lekah Ulises Davila hmangin hmahruaina goal an khung a, mahse Bengaluru hian minute 19-naah Boithang Haokip hmangin an sut. 

Goal dang a luh loh reng hnuah bench aṭanga luhtir Sunil Chhetri chuan minute 72-naah hmahruaina goal a rawn khung a, India captain hian mikhual team hi hnehna a chanpui mai dawn niin a lang hman.

Mahse, Delhi-in Serchhip tlangval Daniel-a an nei a, inkhel thlak danglamtu chu Sunil Chhetri ni loin Daniel-a zawk a ni. 

Second half-a bench aṭanga luhtir forward hian minute 77-naah si phurh sutna goal a khung a, minute 81-naah chakna goal a khung zui - Serchhip tlangval hi a vanneih ṭum chu ni se hattrick siam thei a ni a, mahse a chance neih dang vawi hnihah goal a khung thei lo. 

Daniel-a'n goal hnih khunga a team hnehna a chanpui avangin Hero of the Match-ah thlan a ni a, Serchhip tlangval hi Bengaluru tana khel ṭhin a nih avangin a club hlui laka a goal khung hi a lawm duh lo. 

Norwegian club Viking FK-a trial nei Lallianzuala Chhangte chu a hun hman a zawh hmain koh kir a ni a, Bengaluru hi Delhi club tan a hmachhawn ve lehnghal. 

Daniel-a'n chance vawi khat dang a neih chu Lianzuala siamsak hi a ni a, Daniel hian mual vei lam sir aṭanga Lianzuala siamsak hi a tlawh goal hman lo chiah chiah. 

Lianzuala pawh hi an team an chak piah lamah kut ruakin khelmual a chhuahsan lo a, Limitless Player of the Match atan thlan a ni. 

Zaninah ISL inkhel a awm lo ang.