Under 21 T. Ao NE-ah Mizoram leh Meghalaya group khatah awm

2nd Dr T. Ao North East International NEC Gold Cup Under 21 Football Championship chu Guwahati-ah neih a ni dawn a, Mizoram chu group B-ah Nepal, Nagaland, Meghalaya, Manipur leh Tripura te nen an awm ho.

Kum bithliah inlena hi hmarchhak state senior team inelna T. Ao Football nen hriat pawlh lo tur a ni a, tun ṭuma mi hi chu a vawi hnihna chauh niin Mizoram hi an vawi khat telna a ni.

Inelna hi 'international' a nih angin ṭhenawm ram Bangladesh, Bhutan leh Nepal te an tel a, group A-ah hian Bangladesh leh Bhutan bakah Assam, Arunchal Pradesh leh Sikkim te an awm.

Group khat aṭangin a sang pahnihin semifinal an lut dawn a, Mizoram hi Santosh Trophy qualifying round-a an ngam loh Meghalaya nen an awm kawp a, phuba lak theihna hun ṭha a ni ang.

Khelo India Youth Games Under 21 neih zawh takah Mizoram hian football-ah gold medal an la a, tun ṭuma player-te hi gold medallist te an ni hlawm a. Coaching staff erawh thlak danglamin Mizoram team hi coach Vanlalpeka Ralte leh manager Peter Lalzawmliana ten an ekawl. 

Champion team hian cheng nuai riat, pahnihnain nuai li leh semifinal lut pha chinin nuai khat an dawng dawn a, mimal lawmman ṭha tak a awm bawk.