World Cup 2019 zawh-ah Gayle chawl dawn

West Indies batsman ropui ber zinga mi Chris Gayle chuan nipuia World Cup khelh zawhah one-day international cricket (ODI) a chawlhsan dawn. World Cup hi 30 May leh 14 July inkar hian England leh Wales-ah khelh a ni ang.

Kum 39 mi left hander hian ODI match 284-ah run 9,727 a siam a, West Indian zingah Brian Lara chiah a tluk lo. Chris Gayle chuan, "A tawp lam chu ka hnaih ta, player naupang zawk ten nuam ti takin khel se hahdam taka lo en a hun ve tawh," tiin a sawi a, World Cup zawha chawlh a tum thu a sawi zui bawk.

Gayle hian kum 1999 khan bul a ṭan a, West Indies leh England ten ODI match nga an khelh turah squad-ah telh a ni a, Nilaini aṭangin an khel ṭan ang. 

West Indies batsman hian ODI century vawi 23 a siam a, kum 2015 khan Zimbabwe nen run 215 siamin ODI double century siam thei paruk zingah a tel. Gayle hian West Indies tan Tests match 103 a khel a, ODI leh T20-a insawrbing duh vangin a chawlhsan tawh.

Gayle hian T20 erawh a khelh chhuznawm zel dawn a, England and Wales Cricket Board-in kum 2020-a 100-ball competition an buatsaih hunah tel ngei a tum a ni.