FA Cup-ah club lian an danglam

Khawvel knockout inelna upa ber FA Cup-ah club ṭha danglamna a lang a, fifth round-ah upset hmuh tur a awm lo. Nizan khan Premier League club pahnih Wolverhampton Wanderers leh Crystal Palace ten club nem zawk Bris­tol City leh Doncaster te hnehin quarterfinal an lut a, Championship club inkhelah club langsar zawk Swansea City-in Brentford an hneh bawk.

Crystal Palace manager Roy Hodgson chuan League One club Doncaster Rovers hmachhawn turin player ṭha an luhtir a, Chelsea aṭanga loan hmanga an hawh Michy Batshuayi pawhin a vawi khat nan Keepmoat Stadium-ah Eagles tan bul a ṭan.

Palace tan Jeffrey Schlup chuan minute riatna lekah a khung a, halftime hma hretin Max Meyer chuan goal hnihna tauh lut leh bawkin Premier League hi 2-0 in an chak a, harsatna an tawk lo.

Doncaster manager Grant McCann chuan, "Kan khel ṭha viau a, amaherawhchu Premier League club erawh an danglam a ni," tiin team ṭha zawk an chak thu a sawi.

Palace hian FA Cup nomawi an la chawi lo a, final-ah ṭum hnih lut tawhin 1990 leh 2016 khan final-ah Manchester United ve ve an hneh lo. Tun ṭumah hian club lian Arsenal, Liverpool leh Tottenham Hostpur te an tla tawh a, Palace tana goal khugtu Schlupp chuan, "Tun hi Wembley Stadium thlen theihna hun ṭha a ni," tiin a sawi a, fixture chhuah hunah an dinhmun tur a hriat ang.

Wolverhampton Wanderers chuan kum 2003 hnua a vawi khat nan quarterfinal an thleng a, Ashton Gate-ah Bristol City 1-0 in an hneh hram.

Championship club an ṭang khawng a, amaherawhchu Pre­mier League club tan ding lama Matt Doherty thawhrah sengin Ivan Cavaleiro chuan minute 28-naah goal awmchhun a khung.

Bristol City manager Lee Johnson chuan, "Ka naute khelh danah ka lawm a, a bik takin second half-ah kan khel ṭha em em a, a tawp kan thleng pha teuh ṭhin hle. Stage sang zawk thlen kan duh avangin kan chak lo hi kan hnual hle," tiin a sawi.

Wolves boss Nuno Espirito Santo chuan, "Min ṭantute kan lawm lai ka hmuh khan ka hlim lehzual. Quarterfinal atan duh thlang thei ilang chuan Molineux-ah khelh ka duh," tiin a khingpui duh zawng an zawhna chu chhang loin an mual Molineux Stadium-a an khelh theih chuan a lawm tur thu a sawi thung.

Swansea City chuan Cham­pion­ship lama an elpui Brent­ford mikhualin 4-1 in an hneh a, chutihrualin awlsam taka chak an ni lo. 

Brentford hian Ollie Wat­kins hmangin hma an hruai a, anmaherawhchu Luke Daniels-a'n an lama a tih luh vangin Swansea-in an nihrual. Welsh club hian second half-ah harhtharna an chang a, Daniel James hmangin minute 53-naah hma an hruai a, Brentford player Ezri Konsa chu hnawhchhuah a nih zui avangin Swans hna a awlsam phah.

Swansea City tan Bersant Celina leh George Byers ten an khung belh a, 2-1 in an chak. Swans tan tun hi FA Cup quarterfinal-a vawi nga an luhna chauh a la ni.