Williams inpeih hman lo

Formula 1 team Wil­liams chu nimina pre-season test neih turah an inlan ve thei lo a, vawiinah chuan inlan thei tura beisei an ni. Pre season test hi Thawhṭanni aṭang khan Circuit de Catalunya-ah ni li chhung neih tur a ni ang.

Kar hmasa khan British team hian an beisei leh duhthusamin hna a tluan tawk loh thu an sawi tawh, season hmasa pumpuia point sarih chauh hmu chunga team championship lama hniam ber hian nasa takain hma an la sawn dawn lo niin a lang.

Deputy team principal Claire Williams chuan, "Kan duh dan chu a ni bik lo, mahse a tir aṭangin kan buai nghal tihna erawh a ni bik chuang lo. A ni khatnaah inpeih lo mah ila a rang thei ang berin kan inpeih ang," a ti.

Car intlansiakna sang ber F1 hi March 15-ah ṭan a ni tawh dawn a, season thara intlansiakna hmasa ber atan Melbourne-ah Australian Grand Prix an tlan ang.