Wawrinka hnehin Monfils a champion

Pathianni zan khan Gael Monfils chuan Stan Wawrinka hnehin Rot­terdam Open nomawi a chawi a, French tlangval hian January 2018 hnua a vawi khat nan ATP Tour title a la ve leh chiah a ni.

Kum 2016 khan Mon­fils hi final-ah a vanduai tawh a, a khingpui Waw­rinka erawh 2015 cham­pion a ni thung. Inkhel in­hnehtawk takah Monfils-a'n 6-3 1-6 6-2 in hnehna a chang a, set thumna an khelh hian hliam dam hlim Wawrinka-a'n thahrui a nei tlem zawk tih a lang.

World number 33 Monfils hian kar hmasa kan Sofia Open-ah final a lut tawh bawk, tun kara ranking chhuak tharah chuan nasa taka hmasawnin 23-na dinhmun a luah tawh dawn a ni. Grand Slam vawi thum champion tawh Wawrinka erawh a khup hliam zai a nih hnuah hlawhtlinna lian a la chang thei rih lo.

Kum 32 mi Monfils chuan, "ATP title ka lak hnuhnun ber chu 2018 Qatar Open kha a ni a, a dang chawi leh turin ka nghak rei hle. Stan nen hian kan training dun nasa hle a, final-a kan hneh hi a mak ka ti zawk hial, ani nen hian inelna nuam leh hlimawm kan neih chhunzawm ka beisei," tiin a sawi.