Inṭhen chhan sum a ni lo - Osaka

Tennis world number 1 Naomi Osaka chuan a coach Sascha Bajin nen an inṭhen vanga buaina neih chhunzawm a duh loh thu a sawi a, mitam takin an puhna 'sum' vang tih pawh thuthang satliah a nih thu a sawi chhuak.

Australian Open nomawi a chawi aṭanga ni 16 hnu lekah Osaka leh Bajin te hian an thawhdunna a tawp thu an puang a, a chhan tak tarlan a ni lo. Bajin kaihhruaina hnuaiah hian Japanese player hian nasa takin hma a sawn a, 2018 kum bul lama world number 72 kha tun din­hmunah chuan a chung berah a awm tawh.

Kum 21 mi Osaka chuan, "Ka hringnun a ni a, ka hlim leh lawmna zawng zawng kha thawklehkhata thamral tir vek ka tum lo, tuk tin hian hlim leh phur takin practice neih zel ka duh," tiin a sawi.

Serena Williams, Victoria Azarenka leh Caroline Wozniacki te nen pawha lo thawkho tawh Bajin hi nikum khan 2018 WTA coach of the year atan thlan a ni a, tun dinhmunah chuan tennis coach ṭha leh ngaihven hlawh berte zinga mi a ni mek.

Japan nula Osaka chuan, "Kan inkar chik taka lo ngaihven chuan an hre­thiam ang, Australian Open kan khelh lai aṭang khan boruak ṭha lo a awm tawh. Mahse, a chanchin ṭha lo sawi chhuah hi a ṭul ka ti lo, hun hlim­awm tak min tawnpui tawhna avang khan ka lawm hle zawk a ni," tiin a sawi.

Grand Slam vawi hnih champion tawh Osaka hi tun dinhmunah hnungzâng na vangin a chawl mek a, French Open khelh hmain clay court season a hmang hman ngei tura beisei a ni.