Icardi awm lohna Inter chak
Inter Milan chuan an captain aṭanga an hnawl tak Mauro Icardi awm loh laiin hnehna an chang leh ta. Pathianni zan Serie A inkhelah Danilo D'Ambrosio leh Radja Nainggolan te goal hmangin an mikhual Sampdoria 2-1 in an hneh.
Luciano Spalletti nauten hnehna an chan avangin pathumnaah an dinhmun an sawhnghet a, point 46 hmuin an hmelma AC Milan aiin point liin an sang zawk; champion beisei tawh lo mah se season thara Champions League khelh ngei erawh an tum.
San Siro-ah Icardi inkhel lo mah se mipui zingah a nupui leh agent ni bawk Wanda Nara nen hmuh tur an awm. Argentine striker hi a contract thar chungchanga indawrna an neih danah fuh tawk lo a awm a, captain a nihna hlihsak niin Europa League an khelh ṭum pawhin a inlan lo tawh bawk.
Inter manager Spalletti chuan Icardi chungchang sawiin, "San Siro-a a rawn kal kha a lawmawm, inkhelh zawh hnuah player dangte nen chak lawmin hlim taka hun kan hmang thei kha a lawmawm hle bawk. Pangngai takin a rawn kir leh ang tih ka ring," tiin a sawi.
Pathianni zan inkhel dangah pahnihna Napoli chu Torino nen goal lut loin an inhnehtawk a, Carlo Ancelotti naute hian champion lai leh hmahruaitu ni bawk Juventus an phak lohna chu point 13 ngawt a ni tawh - Turin club hi a zawna vawi riat champion turin an dinhmun a ṭha leh tawh hle.