Juve-ah Miralem Pjanic a nghet
Juventus midfielder Miralem Pjanic chuan club dang aṭangin sawmna duhawm dawng mah se, tuna a khelhna Turin club chhuahsan tumna a neih loh thu a sawi chhuak.
Bosnia international Pjanic hi club lian tak tak Paris Saint-Germain, Manchester United, Chelsea, Real Madrid leh Bayern Munich ten an ngaihven nia sawi a ni a, Arsenal midfielder Aaron Ramsey-a'n Juventus a zawm tak bawkah chuan a chanchin hian sawi zui a hlawh zual.
Kum 28 mi Pjanic chuan, "Club ṭhenkhat min ngaihventu chu an awm ngei mai, mahse club khelhna thlak a ngaih chhan ka hre lo. Juventus hi club lian ka khelhna hnuhnung ber a ni ngei ang tih erawh ka sawi ngam lo, transfer hi chu player duhdan chauh a ni bik lo a, club-in min chhawr duh em tih hi ngaihtuah tel a ngai," a ti.
Serie A hmahruaitu Juventus hian Nilaini zanah Champions League last 16 khel turin Atletico Madrid an lenchilh dawn a, tun season chhungin league bakah UCL chawi an tum ruh hle.