Lyon-in Barca leh Messi mikhual dawn

Barcelona-in zanin dar 1:30 hian Parc Olympique Lyonnais-ah Lyon hmachhawn turin an lenglut dawn a, Catalan club hian Lionel Messi nei mah se Ligue 1 club lakah fimkhur a ṭul ang.

French club Lyon hian Man-chester United hnehtu Paris Saint Germain chu Ligue 1-ah an hneh thei a, Champions League-ah Mancheser City nen group khatah awmin English champion hi Etihad Stadium-ah an hneh bakah an mualah an inhnehtawk pui a, namnul chi an ni lo tichiangtu a ni.

Barcelona forward Ousmane Dembele chuan, "OL Stadium hi a lian a, a mawi bawk a, Barca-in kan tlawh hunah chuan thawm an nei ṭha bawk ang. Team ṭha tak an ni a, player an nei ṭha a, tun season-ah PSG leh Man City te an hneh tawh a, a awlsam dawn lo. Ligue 1 inkhel hi uluk takin ka thlir a, an player ṭhenkhat Fekir, Mendy leh Moussa Dembele te hi ram tana ka khelhpui an ni a, player ṭha tak vek an ni," tiin an ram club chu a dah sang hle.

Lyon hi Ligue 1-ah pathumna dinhmun an hauh mek a, Manchester United-a hlawhchham Memphis Depay chu player pawimawh niin Dutch forward hian harhtharna an chang a, a theihna tak a pholan avangin Barcelona tlarhnung tan ven uluk ṭul tur a ni.

Amaherawhchu, Europe club hlawhtling ber zinga Barcelona te nena khaikhan ralah chuan French club hi eng ruai an ni pha lo a, a chetsual palh theih tihna chauh a ni a. Kum 10 liam ta khan last 16-ah bawk inhmachhawnin Pep Guardiola enkawl Barca chuan 6-3 in Lyon hi an hneh a, French club hian Catalan club vawi ruk an hmachhawn tawhah vawi khat mah an la chak lo.

Barcelona thiampuipa Lionel Messi chuan Lyon hi vawi li hmachhawn tawhin goal thum a khung tawh a, Argentine forward hi kum 31 mi ni tawh mah se a vanglai ang reng a la ni a, tun season-ah pawh goal 30 a khung tawh. Champions League bikah Messi hian goal ruk a khung a, Dembele chuan, "Football khelh hi a ti awlsam hle. Ball han pe ila, ani chuan thil ropui tih nan a lo hmang ṭhin. Khelmuala a awm tawh chuan kan khingpuite hian an veng bik ṭhin a, chu chuan hna a tih awlsam phah hle," tiin an captain a fak.

Catalan club hian Messi bakah Luis Suarez, Philippe Coutinho leh Dembele te an kawl a, hming langsar lo zawk Malcom leh Kevin-Prince Boateng te pawh hi Lyon-ah chuan star ni tur vek an nih avangin khualmuala khel tur ni mah se zaninah hian Barcelona hi an buk a rik zawk ang.

Barcelona hian an chetsual ṭumah pawh quarterfinal tal hi chu an thleng zel tihin a sawi theih a, last 16-a an tlak hnuhnun ber chu kum 2007 daih tawh kha niin Liverpool lakah an tlawm. Hemi hma season hian Arsenal hnehin Champions League-ah an champion  a, hemi hnu hian Pep Guardiola hnuaiah vawi hnih an champion a, nomawi an chawi hnuhnun ber erawh Luis Enrique hnuaia kum 2015-a an champion kha a ni thung.