NBA All-Star Game a hmuhnawm

February 18 zing khan 2019 NBA All-Star Game chu Charlotte Hornets khelmual Spectrum Center, Charlotte-ah khelh a ni a, inkhel hmuhnawm leh ngaihhlut hlawh takah Team LeBron chuan Team Giannis lakah 178-164 in hnehna an chang.

Team Giannis lamin bul ṭan fuh zawkin quarter hmasa berah point 53 ngawt an nei thei a, chawlhlawk laiin 95-82 in hma an hruai. Mahse, Third quarter bikah Damian Lillard, Bradley Beal leh Klay Thompson te rawn che ṭhain Team LeBron hian Team Giannis 50-36 in an lehpel a, inkhel pumpuia point 31 neitu Kevin Durant chu a vawi hnih nan All-Star Game-ah MVP atana thlan a ni.

NBA All-Star Game hi ṭum 68 an neihna chiah a ni a, a tlangpui thuin Eastern leh Western Conference anga kalpui ṭhin a ni, kumin hi hetiang ni loa an kalpui vawi hnihna a ni; kuminah hian February 17 aṭang khan inelna hmuhnawm leh ropui tak tak neih a ni tawh bawk.

Slam Dunk Contest-ah Hamidou Diallo leh Dennis Smith Jr. an inel na hle a, Oklahoma City Thunder star Diallo hian ṭum hnih a dunk-naah feet 7 leh 1 inch zeta sang Shaquille O'Neal zuan khum chungin basket thuk takin a zen pah a, 'Rim' ah a kiu thlep hnawkin a uai - a theihna san chungchuan zia lantirin pakhatna dinhmun a luah.