PSG chakna Mbappe goal mawi

Kylian Mbappe-a goal mawi leh ropui khung hmangin Paris Saint-Germain chuan Saint-Etienne 1-0 in an luhchhuah a, Paris club manager Thomas Tuchel chuan goal awmchhun khungtu chu player ṭha chungchuang bik a nih thu a sawi.

Pathianni zan French Ligue 1 inkhelah PSG lamin inkhel thunun mah se goal khung an harsat a, hun tawp hma minuute 17 chauh a awm tawh tihin Dani Alves-a ball pek chu lei a thlen hmain laklawh nei miah loin St Etienne goal-ah a hlap lut a, tun season kal laia a league goal 19-na a ni, goal dang a lut zui tawh lo.

PSG manager Tuchel chuan, "St Etienne kha hmachhawn an harsa dawn tih ka hria, an khelmual aṭanga point thum kan hawn thei hi a lawmawm hle a ni. A nihna takah chuan an khelmual kha a mam tawk loh avangin inkhelh a harsa, ka naute khan an rilru paukhauhna hmangin hnehna an chang," a ti.

France international Mbappe-a'n Manchester United lakah goal pawimawh a khung zo chiah a, striker Edinson Cavani leh player manto ber Neymar awm loh hlan bawkin a club a chakpui leh - kum 20 mi chauh la ni mah se khelmual chhungah a puitling tawh takzet.

German manager Tuchel chuan, "Mbappe a inkhel thei a nih chuan a thlamuan thlak ṭhin, a ṭha rual zingah hian danglamna siam thei bik an awm zeuh zeuh ṭhin a, chutiang zinga mi chu a ni," a ti a, Angel Di Maria leh Julian Draxler ten goal khung lo mah se fak phu khawpa an khelh ṭhat thu a sawi tel bawk.

French champion hian league match 23 an khelh aṭangin point 62 hmuin hmahruaitu an nih chhunzawm a, anmahni hnaih bertu Lille aiin point 12 zetin an sang fal, Tuchel-a naute hian match hnihin an la khel tlem zawk bawk a ni.