AFCON 2019 Final Senegal leh Algeria - Africa 'Lal' nih inchuh!

Africa Cup of Nations final chu zanin dar 12:30-ah khelh a ni dawn ta a, Senegal leh Algeria ten Africa khawmualpuia football thiam ber nih an inchuh dawn. 

Senegal-in AFCON nomawi an la chawi ngai lo a, Algeria erawh kum 1990 khan an lo champion tawh thung - inchhuang thei an awm lo. Tun inelnaa Algeria player tam zawk hi an champion kum hian an la piang lo a, ram tana champion ropuizia hre turin zaninah Senegal hneh an tum ang. 

Senegal hian 2002 khan an football kum ṭha hmangin World Cup an vawi khat khelhnaah quarterfinal an lut a, AFCON final an lut bawk - nomawi erawh an chawi ta lo. 

Group stage-ah Algeria leh Senegal an awm ho a, Algeria hian Youcef Belaïli goal khung hmangin 1-0 in an hneh - hei hi tun inelnaa Senegal tlawm awmchhun a ni. 

Result hmasa avangin Senegal an fimkhur ang tih a chiang a, captain Cheikou Kouyate chuan 'phuba' tih lamin an rilru a luah loh thu a sawi. Crystal Palace player chuan, "Phuba lak duhna thinlung nen kan kal dawn lo. Kan tum chu hnehna chan a ni mai a, kan theihna zawng zawng kan pe dawn a ni," a ti. 

Senegal theihna enin Algeria tan 'hneh hnu' tih vanga inthlahdah a thiang dawn lo a, Senegal-in tlawm nawn an duh dawn lo tih a chiang. 

Algeria hian tlawm nei miah loin final an lut a, an final luh kalkawngah goal hnih chiah an la chhuah avangin tlarhnung an nei ṭha tawk tih a chiang. 

Real Betis defender Aissa Mandi hoa Algeria tlarhnung inrem hi Sadio Mane hoin Senegal-in sut hawn an tum dawn a, a hmuhnawm dawn. Algeria hian final lut turin goal kua ngawt an khung a, an final zinkawng en pawhin champion turin rin an hlawh zawk - a awm lo hran lo. 

Riyad Mahrez captain-na hnuaia khel team hian group stage-a Senegal an ngam bakah knockout round-ah Guinea, Ivory Coast leh Nigeria an hneh thei a, inrintawkna an nei sang khawp ang. 

Senegal hi an final zinkawng thlir chuan Algeria aiin an vannei zawk tih ngam a ni - knockout round-a an ngam team hi Uganda, Benin leh Tunisia te an ni a, Algeria hmaa ding ai chuan an nem zawk. 

Algeria aiin Senegal-in fiahna an la hmachhawn tlem zawk tih pawhin a sawi theih a, a pawimawh berah Algeria an hneh erawh chuan 'an kawng a awlsam zawk' tih hi sawi fo chi a ni lo ang. Senegal hian final-ah vanduaina erawh an nei sa a, an defender rinrawl leh chhuanvawr Kalidou Koulibaly chuan hrem vangin final a khel ve thei dawn. 

European football-a defender ṭha ber pawl tih hiala sawi ngam tel loa Algeria hmachhawn hi Senegal tan a harsa dawn tih a chiang. 

Senegal-in 4-2-3-1 formation bawk an rawn hmang tura ngaih a ni a, Koulibaly awm loh avangin tlarhnung laia Kouyate kawppui turin Schalke defender Salif Sane chu lut tura ngaih a ni. 

Tlarhnung ti kim turin Bordeaux defender Youssouf Sabaly leh Turkish club Göztepe defender Lamine Gassama te chu lut tura ngaih an ni. Tlarhnung pui turin midfield laiah Malaga player Alfred N'Diaye leh Bursaspor midfielder Henri Saivet an lut ang. 

AC Milan striker hlui M'Baye Niang chu tlarhmaah a mal tlat ang a, a hnung chiahah amah thlawp turin Everton midfielder Idrissa Gueye a awm rin a ni. Mual ding lam sir aṭanga nawr turin Rennes winger Ismaila Sarr a lut ang a, tun inelnaa goal thum khung tawh Mane chu dinglamah awmin 'zalenna' pek a ni ang. 

Riyad Mahrez a awm miau avangin Algeria an chhe thei lo tih a chiang a, goal thum khung tawh Manchester City midfielder hi mual ding lam sirah a tal ang. 

Algeria hi 4-1-4-1 formation hmang leh tura ngaih an ni a, tlarhmaah Al-Sadd striker Baghdad Bounedjah a mal tlat ang a, a khelh ṭhat loh chuan a thlak turin Islam Slimani a la awm cheu. Midfield-ah Mahrez dinpui turin Galatasaray midfielder Sofiane Feghouli, Empoli midfielder Ismael Bennacer leh ES Tunis forward Youcef Belaili te an awm ang a, tlarhnung pui turin Nottingham Forest midfielder Adlene Guedioura a awm bawk. 

Real Betis defender Aissa Mandi, Rennes right back Mehdi Zeffane, Al-Shabab centre back Djamel Benlamri leh Rennes defender Ramy Bensebaini-te tlarhnungah an intlar ang a, Senegal tan a awlsam lo ang.