Player-ten Man City captain thlang dawn

19th July, 2019

Pep Guardiola chuan Manchester City captain chu mimala a ruat loh tur thu a sawi a, Premier League champion player-te hian pre season tour an hman zawh hnuah an hruaitu tur hi an thlang dawn a ni.

Man City captain Vincent Kompany-a'n season hmasa tawp rualin Etihad Stadium a chhuahsan a, a aiawh tur hi tihfel a la ni lo. July 17, Nilainia West Ham nen China-a friendly match an khelhah David Silva chu captain armband hrentir a ni thung.

Spanish manager Guardiola chuan, "Player an rawn kir kim hunah an captain tur chu an mahniin an thlang ang," a ti. City playmaker Kevin De Bruyne chuan a ṭhianten captain atana an thlang a nih chuan a pawm tur thu a sawi a, mahse mahni ngaihdan chauh ni loin an zavaia ngaihdan lak a ngaih thu a sawi.

Premier League Asia Trophy semifinal-ah hian City hian 4-1 in hnehna an chang, Mark Noble penalty hmangin West Ham lamin hma hruai mah se Silva-a'n a sut a, forward Lukas Nmecha chuan penalty aṭanga an hmahruaina a khung bakah substitute Raheem Sterling chuan goal hnih a belh.

Hammers lakah hian Man City player manto ber Rodri pawh a inlan a, Atletico Madrid midfielder hlui hi Guardiola hnuaiah inbengbel rang thei tura ngaih a ni. Bayern Munich nena sawi zawm hlawh Leroy Sane pawh a inlan bawk.

Pep chuan, "Sane hi kan hnena cham turin kan duh, player zawng zawng hlim taka awm tur pawhin kan duh. Amaherawhchu, tun hma lama ka sawi fo tawh ang tho khan, kan hnena awm duh lo chu an chhuak thei ang," a ti.

Premier League Asia Trophy-ah team pali Manchester City, West Ham, Wolverhampton Wanderers leh Newcastle United te an tel a, semifinal hi Nanjing Olympic Sports Center Gymnasium-ah khelh a ni. Wolves hian final lut turin Newcastle chu 4-0 in an hneh a; Diogo Jota goal hnih, Morgan Gibbs-White goal khat bakah Thomas David Allan chuan an lamah a tilut.

Manchester City hian Inrinni tlai dar 5:00 hian final-ah Wolves chu Hongkou Football Stadium, Shanghai-ah an hmachhawn ang. Hemi hmunah tho hian Inrinni tlai dar 3:30 hian Newcastle leh West Ham ten pathumna an zawng bawk ang.