FIFA leh AFC-ah I League club zualko dawn

All India Football Federa­tion-in India rama league sang ber ni tura Indian Super League kalpui a tum avangin I League club an ngawi mai mai lo a, football khawvela thuneitu sang ber FIFA hnenah an zualko dawn. 

I League club-te hian FIFA bakah Asian Football Confe­deration (AFC) an be dawn bawk a, football thuneitu sang pahnihin an chhanlet dan a zir hian an hmalak zel dan tur ruahmanna an siam ang. Solicitor General of India pawh lo ni tawh Mohan Para­saran chu I League club-te hian an hmu bawk a, Supreme Court senior ukil hnen aṭang hian thurawn an la. 

I League club te hian an ruahman dan angin AFC leh FIFA thuneitute an hmu phawt ang a, an beisei anga chhanna an hmuh loh chuan court lamah an kal dawn a ni. 

Supreme Court-a senior ukil Mohan Parasaran hnenah hian AIFF leh Football Sports Development Ltd (FSDL) ten inremna an ziah Master Rights Agreement (MRA) chu an pe bawk a, court-ah an kal a nih chuan Parasaran hian a din sak ang. 

Parasaran hi 2014-a Chur­chill Brothers tana Delhi High Court-a lo ding tawh kha a ni a, khatihlai khan Goan club hian first division license AIFF-in an cancel sak chu an khing a ni. 

I League club-te hian AFC leh FIFA hnenah an lungawi lohna hi lehkha in an thawn phawt ang a, ni 10 chhunga chhanna mumal tak an hmu lo a nih chuan Supreme Court-ah hian an kal ang. 

Indian Super League hnuaia awm tura tih I League club-ten court kal an zuam viau hi thil mak a ni hran lo a, Mohan Pa­rasaran-a'n a din sak dawn miau avangin beiseina an nei sang. Parasaran hi kum kua zet chu Additional Solicitor General of India lo ni tawh a ni a, February 2013 - May 2014 chhung khan Solicitor General of India a ni a, dollar tluklehdingawn 3.2 chungchanga buaina Vodafone case-ah pawh a lo ding tawh. 

I League club ten India prime minister Narendra Modi hnen­ah lehkha an thawn tawh a, sports minister Kiren Rijiju chu inbiak­na an lo neihpui tawh bawk. 

Mohun Bagan leh East Bengal an duhthawh fal a, West Bengal BJP hotupa Kailash Vijayvargiya dawrin an buaina chu chinfel sak turin an ngen! Mohun Bagan hotu pahnih Debashish Dutta leh Srinjoy Bose, East Bengal hotu De­ba­brata Sarkar leh Shanti Ran­jan Dasgupta te chuan BJP hruaitupa hi an dawr. 

East Bengal leh Mohun Bagan ten fans maktaduai tel an nei miau a, an fans neihte hlutzia hriain BJP general secretary Kailash Vijayvargiya chuan club pahnih hi puih a inhuam thu a hrilh. 

Vijayvargiya chuan Kolkata club lian pahnih hi indawrna an neih hnuah lehkha a thawn a, "Indian football tana in thawhhlawk zia ka hria a, puih theihna che u ka nei a nih chuan ka lawm khawp ang," a ti! BJP hruaitupa hian I League club pahnihte hi an duh a nih phawt chuan Ministry of Youth and Sports nena inbiakna nei tura ruahmanna a siamsak theih thu a hrilh. 

West Bengal-a football thu­neitu sang ber Indian Football Asso­ciation pawh an ngawi mai mai bik lo a, IFA president Ajit Banerjee chuan AIFF president Praful Patel hnenah lehkha a thawn. 

"Indian top flight football khel tura East Bengal leh Mohun Bagan hming a lang lo hi mak kan ti a, Indian football ṭhan zelna atana club pawi­mawh an nihzia ngaihtuah phei chuan top flight football khelh ngei ngei an phu a ni," tiin lehkhaah hian a ziak. 

Indian Football Association (IFA) president Ajit Banerjee hi West Bengal chief minister Mamata Banerjee unaupa a ni a, I League club-ten ṭantu an neih belh zel.