Pasalṭha chungnung zawk

Nilaini zan khan GIG Motors Taekwondo Fight League-ah Armed Veng club pahnih an intawng a, Armed Veng South Pasalṭha chuan Armed Veng Warriors chu 125-123 a hnehin semifinal lut hmasa ber an ni.

Electric Veng YMA Hall-a inkhelah a vawi khat nana TFL kheltu Armed Veng South an hmuhnawm chhunzawm a, match thum an khelh tawhah hnehna an chang vek - champion lai Warriors an hneh tak avang hian table-ah pawh hmahruaitu an nih chhunzawm zel.

Armed Veng tan Van­lalmawipuia chu mimal­in a khel ṭha hle, ani hian player manto H. Vanlalfela lakah Player of the Night lawmman dawng thei khawpin khel mah se a team a chakpui zo ta chuang lo. Vawi thum an khelhah a ṭum hnih nan Armed Veng an tlawm a, team thar ve ve ngam loin, an ṭhenawm team an hneh loh hmain Republic Vengthlang Figh­ters lakah an tlawm tawh. Mahse, Zirtawpni zanah Zopa Goldsmith Chawnpui hmachhawn lehin league an khar dawn a, an chak chuan an tlang ang.

Armed Veng South-in July 23, Thawhlehni zanah Republic Veng­thlang an tum dawn a, team thar pahnih hi an khelh chhoh dan aṭanga rin kai ve ve an ni. League kharna inkhela an intawn rualin pakhatna ni chunga semifinal lut zawk nih an inchuh tel nghal dawn a ni.

Nilaini zan hian cadet league lam pawh khelh chhunzawm a ni a, St Joseph Higher Secondary School Ramhlun Sporting Club Fighters chuan Exodus English School chu 156-137 in an hneh.