Suzuki Gixxer SF 250 20th Inter Branch YMA Football Tournament

CYMA Football-a record nei ṭha lawrlak Armed Veng chuan a vawi 10 nan final an lut a, Lammual-a semifinal inkhel hmuhnawm takah Bethlehem Vengthlang chu penalty shootout hmangin an hneh.

Nimin Armed Veng leh BVT inkhelah hian hun pangngai leh extra time-ah goal lut loin penalty shootout-ah Lalbiaksanga Colney hote 4-3 in an vannei.

Bethlehem Vengthlang coach Lawmzuala Pautu chuan, "Champion kan châkzia hi sawi turin thuin a daih lo," tiin champion an châk thu a sawi a, an coach thusawi hi player-te'n a takin an pholang.

First half-ah BVT an khel ṭha zawk a, Armed Veng tlarhnung an rim hle. BS-a Colney hian first keeper Andrew Lahmingliana hliam vanga a chhawr theih loh avangin keeper pathum zinga la inlan lo awmchhun KC Vanlalruatdika a chhawr a, BVT player-te'n Armed Veng ṭantute awm nuamin an awmtir lo.

BVT forward Zaithanmawia'n box pawn aṭanga a back volley hmangin keeper Ruatdika a pet khum a, mahse goal ban a per. Laldingngheta leh Lalrammawia ten Armed Veng tlarhnung an rum ṭhaih bawk. First half-ah Armed Veng tana Lalramchullova freekick tih loh chu hlauhawm a awm lo.

Second half-ah Armed Veng an insiamṭha a, BVT aiin goal chance an nei ṭha ta zawk. Tun inelnaa goal ruk khung tawh Lalfakzuala'n hnai tak aṭangin substitute Lalhriatzuala aṭanga a ball hmuh chu a tauh a, BVT keeper Lalmuansanga'n a dan sak.

Hun chanve hnu lamah hian Mizoram Police foward Fakzuala goal khung chu offside vangin pawm a ni lo a, Armed Veng leh BVT ten minute 90 chhungin goal an khung lo. Chhun pachanga inkhel ni mah se team pahnihin chak an duh avangin extra time pawh a la entlak hle.

BVT defender PC Lal­dinpuia'n corner kick aṭanga a ball hmuh chu crossbar a tauh per a, hemi per pawh hi a hlauhawm zui chungin Armed Veng an him hlauh. Extra time-ah pawh a goal a lut chuang lo. 

BVT keeper Lalmuansanga'n quarterfinal-ah penalty vawi hnih a dang a, Armed Veng keeper Ruatdika pawh hian NECS Cup semifinal-a Lengpui an hneh ṭumin bench aṭanga lutin a team a chakpui.

Armed Vengin an pet hmasa a, pet hmasa pali Lalmuanzova, Lalbiakhlua, Lalchhuanawma leh captain F. Lalmuanpuia (Koto-a) ten an pet goal vek. BVT tan Lalmalsawma leh Zaithanmawia ten an khung hnuah Lalrintluanga pet chu Armed Veng keeper Ruatdika'n a dan sak a, palina a pettu Hmingthanmawia'n a rawn pet lut leh tho.

Chakna goal khung tumin Lalramchullova rawn chhuak mah se Armed Veng player pawimawh hian a pet over a, BVT chhanhim turin captain K. Lalṭhathanga (Puitea) a rawn chhuak. Tun inelnaa khel ṭha Puitea hian mawhphurhna hlen zo loin crossbar a pet per a, BVT-in an tum ram an thleng zo ta lo.

CYMA Football hi vawi 20 khelh a ni tawh a, Armed Veng hian vawi 10 zet final lutin an record a ṭha lawr lak. Nomawi chawi kawngah pawh Armed Veng hi vawi nga champion tawh an ni a, anmahni hnaih bertu Electric Veng pawh vawi thum chauh an la champion.

Armed Veng coach Lalbiaksanga Colney chuan, "Kan vannei ṭhin a, a lawmawm hle. Tun inelnaah pawh hian inkhela kan chungnung bik lo chungin kan vannei zawk ṭhin a, nomawi chawi thei turin vannei zel ila kan ti hle," tiin Vanglaini a hrilh a, vengchhung mipui ṭawiawmna ṭha chu an chakna hnar a nih thu a sawi bawk.