Juventus ti êng turin De Ligt

"Êng lo awm rawh se," tiin Juventus thuneitute an ṭawng a, Matthijs de Ligt pekin an awm. Dutch defender hian Italian champion a zawm fel ta. 

Kum 19 mi defender man zat hi pound maktaduai 67.5 a ni a, kum nga chhungin Juventus hian an pe ang a, hetih chhung hian pound maktaduai kua an pek belh a ṭul bawk ang. Ajax chuan an captain kal chhuak ta hi, "Duat takin lo enkawl ang che u," tia Juventus chah chungin an thlah a, season thar aṭang chuan Serie A a khel dawn ta. 

Netherlands international De Ligt hi Manchester United, Barcelona leh Paris-St Germain nen pawh sawi zawm a ni a, mahse Italy pan a thlang. De Ligt-a Juventus zawm chhanah Cristiano Ronaldo a pawimawh hle. 

Juve forward hian UEFA Nations League final-a Portugal-in Netherlands an hneh ṭumin De Ligt hi a club khelhnaa khel ve turin a sawm a, Ronaldo ngaisangtu rawlthar tan hnar harsa tak a ni. De Ligt chuan, "A tirah chuan mak ka ti a, ka nuih phah hial a ni," tiin Ronaldo sawmna chuan a barakhaih thu a sawi a, season thar aṭang chuan an khel dun dawn ta. 

Khawvela rawlthar footballer hlu ber pawl De Ligt hian kar khatah £416,000 vel a hlawh dawn a, kum khata a hlawh 'basic' hi pound maktaduai 14.5 niin pound maktaduai 21.7 thlengin a sang thei ṭhin ang. 

Kum 19 mi defender man atana an in sen zawng zawng nen Juventus hian De Ligt vang ringawtin pound maktaduai 170 chuang an seng dawn tihna a ni a, a tam tham hle. De Ligt-a contract-ah hian 'buyout clause' pound maktaduai 135.6 dah tel a ni a, mahse June 2022 a thlen hma chuan heti zat sum hian lei chhuah ngawt theih a ni dawn chuang lo. 

Matthijs de Ligt hian kum kua mi lek a nih laiin Ajax a zawm a, 2016-17 season khan Dutch club tan a professional match hmasa ber a khel. Ajax tan league match hnihah chiah bul a la ṭan tihin March 2017 khan Netherlands tan a inlan.

Netherlands tana vawi 17 inlan tawh defender hian a season hmasa ber 2017-ah Europa League final a khel nghal a, March 2018 khan Ajax captain naupang ber ni turin captain armband hrentir a ni. Season hman zawh takah khan Champions League semifinal an khel a, Eredivisie leh Dutch Cup-ah champion nomawi an chawi ve ve.