Rawlthar footballer manto; Rooney - De Ligt

Juventus-in khawvela footballer rawlthar manto ber pawl ni turin Matthijs de Ligt an lalut a, Ducth defender an lakluh rual hian khawvelin rawlthar footballer ṭha tak tak a lo hmuh tawhte mitthlaah an lo lang nghal. 

Player ṭhenkhat chu an man phu ang ngeiin an khel chhuak a, club legend hial an nih chhunzawm. Ṭhenkhat erawh beisei an phak lo chhunzawm a, thawm nei na takin an thlanmual tur an pan a lo ni reng si! Kum 2016-a khawvel rawlthar beiseiawm ber pawl Renato Sanches kha a chanchin kan hre zui ta lo a, kum 2004-a Everton aṭanga Manchester United pantu Wayne Rooney erawh a chanchin hrilh nawn kan ngai ta lo. 

Rawlthar beiseiawm lei hi a 'risk' a sang lehzual - club leh player tan! Club tan ho taka sum insen thlawnna a ni thei a, player tan beiseina sang lutuk kara pressure zo loa tlukchhiatna a ni thei bawk. 

Arsenal, Liverpool leh United hnawlin Renato Sanches-a'n 2016 khan pound maktaduai 27.5-in Bayern Munich a pan a, match 50-a inlan sak tawhah goal hnih chiah a la khung. 2017-18 season kha Swansea City-ah loan-in hun a hmang a, match 15-ah goal khung a nei lo. Kum 21 chauh a la nih avangin 'thamral' tia sawi erawh a rem rih lo. 

United legend Wayne 

Kum 2004-ah pound maktaduai 27 man a nih avangin Rooney chu a hunlaia khawvela rawlthar manto ber a ni a, a man a khel chhuak chiang hle. Red Devils tana goal khung hnem ber record chelhin match 559-ah goal 253 a khungsak a, nomawi tam tak zingah Premier League (5) leh Champions League (1) a chawipui bawk. 

Southampton chuan 2014 khan an rawlthar beiseiawm Luke Shaw chu pound maktaduai 27-in United-ah an kaltir a, pound maktaduai 31 thlenga sang chho thei tur a ni. Hliam vangin English defender hian a theihna angin khel chhuak lawk lo mah se United player pawimawh a ni chho ṭan a, season hmasa khan United Players' Player of the Year-ah thlan a ni. 

Kum 2012 kha chuan Lucas Moura hming a langsar a, sum sen huai Paris Saint-Germain chuan hetih hunlaia kum 19 mi hi Sao Paulo aṭangin pound maktaduai 35.5-in an lalut. Mahse, Brazilian forward hian beisei a phak lo a, 2017 khan Tottenham Hotspur-ah pemin London club-ah a vul chho ṭan leh mek. 

May 2017 khan Real Madrid chuan Vinicius Junior an dawr a, hetihlai hian kum 18 a la tlin loh avangin 2018-ah pound maktaduai 38.7-in an lalut. Flamengo forward hlui hian Real B team tan bul a ṭan phawt a, season chawhnu lamah first team tan a khel ṭan. 

Tun nipui transfer-ah Real Madrid-in Santos aṭangin Rodrygo chu pound maktaduai 40-in an lalut a, kum 18 mi theihna hi hmuh tir kan la ni lo. Mahse, kum 11 mi a niha Nike-in an thawhpui tawh a ni a, theihna a nei sang ang tih a chiang. 

Kum 2015 khan Monaco aṭangin United-in Anthony Martial an lalut a, pound mak­taduai 58 insengin khawvela rawlthar manto ber record a siam. United tan match 174-ah goal 48 a khung a, 'flop' tia sawi theih a ni lo a, tifuh viaua sawi a harsa viau bawk. 

Kum 18 mi lek nichunga Ajax captain ni thei a nih miau avangin Matthijs de Ligt man a to hi a mak hran lo a, pound maktaduai 67.8 man hian Dutch club tana a khelh anga a khelh phawt chuan Juventus-in an tisual lo ang. 

Atletico Madrid-in pound maktaduai 113 ngawtin Joao Felix an la ngam a, Benfica forward hlui hian theihna a nei sang tih hai rual a ni lo. Season hmasa khan Primeira Liga-ah match 26 khelin goal 15 a khung a, eng nge a an zel dawn tih chu hunin a hril ang. 

Khawvela rawlthar manto ber Kylian Mbappe chu pound maktaduai 165.7 man a ni a, khawvel footballer manto lamah pawh pound maktaduai 200 man Neymar chiah a tluk lo. Tun dinhmunah chuan PSG-in an la tifuh rih a, Monaco aṭanga an lakluh rawlthar hian match 87-ah goal 60 a khung tawh.