New Zealander of the Year Award dawng thei tur Stokes

England-in Cricket World Cup an champion ṭuma final-a che ṭha tak Ben Stokes chu New Zealander of the Year Award dawng thei tura thlan a ni.

Kum 28 mi Stokes hi New Zealand mipui veltu ni mah se a hnahthawh ropui tak avangin chawimawina dawng thei tur zingah hian an telh. Stokes hi New Zealand-ah a piang a, kum 12 mi a nihin England-ah a insawn.

Award buatsaihtu chief judge Cameron Bennett chuan, "Black Caps tan khel lo mah se Christchurch-ah a piang a, helai hmun hi tun thlenga a nu leh pa chenna a la ni. Hei vang hian Kiwis puala chawimawina siam hi a la dawng thei," tiin thlan a nih chhan a sawifiah.

Award dawng thei tur zingah hian New Zealand captain Kane Williamson pawh a tel. Kumin hi award vawi 11 an semna tur a ni a, tun hmain  New Zealand rugby union captain Richie McCaw, filmmaker Taika Waititi leh mental health campaigner Mike King ten chawimawina hi an dawng tawh.

September thla thleng award dawng thei tur hi a nominate theih a, hemi zawh hian  'judging panel' in mi 10-ah an thlifim ang. December thlaah candidate 10 puanchhuah a ni ang. Chawimawina dawngtu tur hi nakkum February-ah puan tur a ni.