ICC Hall of Fame-ah Sachin leh Allan Donald an dahlut

India cricket legend Sachin Tendulkar chu Ningani khan Madame Tussauds, London-ah South African pace legend Allan Donald nen International Cricket Council's Hall of Fame-ah dahluh a ni a, World Cup vawi hnih champion tawh Australian hmeichhe cricketer Cathryn Fitzpatrick dahluh tel a ni bawk.

ICC Cricket Hall of Fame hi January 2, 2009 khan Federation of International Cricketers' Associations (FICA) nen ṭang­kawpin ICC kum 100 tlin lawm nan tih ṭan a ni a. Cricket ṭantirh lama inelna thununtu England (28), Australia (25) leh West Indies (18) ten player an thawh hnem hle.

Kum 46 mi Sachin Tendul­kar chuan, "ICC Cricket Hall of Fame-ah hian tun hma aṭanga cricket hmasawnna atana tha thawhtute an tel a,  heng zinga ka tel ve thei hi ka tan chuan chawimawina hlu tak a ni. Cricket ṭhan zel nan leh lar nana tih ka nei ve hi ka lawm," tiin a sawi.

Sachin chuan sawi chhun­zawmin, "Tun hun hlu bikah hian ka inkhelh hun chhung rei taka ka khelhpuite chungah lawmthu ka sawi. Ka nu leh pa, ka unaupa Ajit leh ka nupui Anjali te hi ka chakna thahrui an ni a. Ka naupan laia coach Ramakant Achrekar-a'n min enkawl thei kha ka vannei hle a ni," tiin lawmthu a sawi.

Sachin Ramesh Tendulkar hi 5ft 5in chauha sang ni mah se kum 16 mi a nih aṭangin ram tan khel ṭanin Karachi-ah Pakistan nen 15 November 1989-a test match an khelh ṭumin a inlan. Hemi kum vek hian December 18-ah ram tana a ODI match hmasa ber khelin Pakistan nen bawk an inhmachhawn.

Tendulkar hian November 2013 khan inkhelh a chawlhsan a, Tests-ah run 15,921 siamin ODI-ah 18,426 vaw chhuak bawkin a pahnih hian record a ni ve ve. Little Master tia an koh India chhuanvawr hi khawvela batsman ṭha ber ang hiala chhal a ni.

Allan Donald  hi a hun laia vawm na hmingthang a ni a, kum 2003 khan inkhelh a chawlhsan. South Africa pace bowler hian Tests-ah 330 leh ODI-ah 272 wicket a la.