Sindhu a chak laiin Srikanth a tla

Badminton inelna ngaihhlut pakhat Indonesia Open-ah PV Sindhu chuan hma sawn zelin quarterfinal a in vaw kai a, hetihlai hian mipa singles lamah Kidambi Srikanth erawh a khingpui hneh loin second round-ah a zinkawng a tawp thung.

Ningania inkhelah seeded pangana Sindhu hian darkar khat leh minute hnih chhungin Denmark nula Mia Blichfeldt chu 1-14, 17-21, 21-11 in a hneh a, a khingpui nen hian kumin chhunga an vawi thum intawnna niin India nula hi a chak vek.

Tun season chhunga nomawi lian tham la chawi lo Sindhu hian a title hmasa a beisei mek a, a match lehpekah chuan Soniia Cheh leh seeded pathumna Nozomi Okuhara te inkhela chak zawk a hmachhawn leh dawn a ni. Rio Olympic silver medalist Sindhu chak vanga Indian badminton fans an lawm lai hian, mipa singles-a medal beiseina leh seeded pariatna ni bawk Srikanth erawh Hong Kong tlangval NG Ka Long Angus lakah minute 39 chhung chauhin 17-21, 19-21 in a chak lo zawkah a ṭang.

Mipa doubles lamah pawh India tlangval pahnih an che fuh lo, Satwiksairaj Rankireddy leh Chirag Shetty te ṭangdun chu seeded pakhatna Marcus Fernaldi Gideon leh Kevin Sanjaya Sukamuljo te lakah 15-21, 14-21 a chak loin second round-ah an tla. Mixed doubles lamah pawh Pranaav Jerry Chopra leh N. Sikki Reddy te chu 14-21, 11-21 in seeded pakhatna Zheng Si Wei leh Huang Ya Qiong te hneh loin an zinkawng a tawp ve bawk.