Tu nge ropuina ramah lut ang? Armed Veng Vs Chanmari

Suzuki Gixxer SF 250 20th Inter Branch YMA Football Tournament final chu vawiin tlai dar 2:30 hian football hmunpui Lammualah vawi nga champion tawh Armed Veng leh inelna hnuhnung ber finalist Chanmari ten an khel dawn.

Armed Veng hian inelna hnuhnung ber kum 2017-a neihah khan second round-ah Chanmari an hneh lo a, tun ṭumah hian seeded an ni lo. Football thiam veng hian insiamṭha turin hun an mamawh rei lo a, kum 2019 a thlen meuh chuan NECS Cup football-ah an champion.

CYMA Football-ah pawh seeded an nih loh vangin first round aṭangin khel ṭan mah se an buai phah lo a, an ṭhat phah hial zawk tiin a sawi theih. Armed Veng ṭhat lohna bera an sawi chu tlarhnung ni mah se match ruk an khelhah match ngaah goal an chhuah lo. An goal chhuah ṭum pawh hi Zawlnuam Bawrai nen niin first half-a goal ruk an khung tawh vanga an inthlahdah zeuh vang a tih theih.

Armed Veng coach Lalbiaksanga Colney chuan, "Final boruak hi chu a dang daih a, a ni hulh hulh zel. Kan team hian NECS Cup an khelh tawh avangin an talbuai lo ang," tiin Vanglaini a hrilh. Vawi nga champion tawh hian an innghahna F. Lalmuanpuia chu hrem vangin an chhawr thei dawn lo a, BS-a Colney-in midfield a rem dan tur hriat a châkawm hle.

Chanmari hian 2017 khan 1990 hnua a vawi khat nan final an lut a, Ramhlun South lakah an vanduai. Tun ṭumah hian final kalkawng a bumboh a, team ṭha Zemabawk North aṭanga bul ṭanin Aizawl khaw pawn aṭanga seeded team pahnih Khawzawl Joint leh Hnahthial Joint hneh turin penalty shootout an mamawh.

Chanmari coach Samuel Lalrinzuala Sailo chuan, "Champion tumin theihtawp kan chhuah dawn. Final thleng tur khawpa chakna leh huaisenna min petu Pathian hnenah lawmthu ka sawi," tiin Vanglaini a hrilh.

CYMA Football hmasa ber chu 1985 khan khelh a ni a, Armed Vengin Vaivakawn hnehin an champion. Khami ṭum khan F. Lalchhandama (Pâpuia) (L), Dengthansanga, F. Lalchhuanawma (Tun ṭuma captain Muanpuia pa) leh Zohminga Zote te chu an player langsarte an ni hlawm. Player ṭha tamna veng aṭangin player ṭha bawk an rawn chhuak a, chung zinga mi chu tun ṭuma coach Lalbiaksanga Colney hi a ni.

Midfielder ball sem thiam BS-a Colney hian 2003 khan a captain-na hnuaiah Armed Veng hi a vawi hnih nan a champion pui a, 2004-ah erawh final-ah an vanduai. Kum 2005-ah inhliam vangin BS-a hian inkhelh a chawlhsan a, Armed Veng hi enkawl chhoin Electric Veng record khuma champion tam ber an nih theihna turah a pawimawh hle.

Chanmari hi CYMA Football-ah la champion lo mah se 80s leh 90s chhoa team ṭha ber zinga mi an ni a, CYMA Football-ah pawh hian 1989 leh 1990 khan final lutin Electric Veng leh Dinthar an hneh lo. 

Hetih hunlai hian tun ṭuma Chanmari final thlenpuitu coach Samuel Lalrinzuala Sailo pa Laldinpuia Sailo chu an keeper pawimawh niin Ngurdingliana (DV-a), Zamliana Sailo (L), Maliana leh Mathlenga  te chu an innghahna te an ni a. Heng player ṭha rual hi Lalhema Memorial Football Tournament (1984), J. Lalsangzuala Tournament, Venghnuai (1989) bakah inelna hrang hrangah champion mah se CYMA Football-ah an la champion ngai lo.

Tualchhung football-ah Chanmari an han reh vang vang a, Red Ribbon Football 2012-ah rawn champion lehin hemi hnu hian Chanmari FC nung takin an kalpui nghal. An football club hi Mizoram Premier League, MFA Super Cup, I Day Football leh MFA Cup-ah te an champion a, amaherawhchu CYMA Football-ah an la champion lo.

Hranghluiten tun hma ang thoin nomawi an la duh a, ṭhangtharten nomawi an chawi theih nan thu chauh ni loin Lammualah ngei an ṭawiawm dawn.

CYMA buatsaih inelnaa final lutte hi YMA ang zawng pawha veng entawntlak an ni a. Chanmari hi khawhar in leh mitthi lumennaah in a te emaw a lian pawh ni se in khat ṭhap a, kal ṭhin veng an ni. Aizawl veng lian tih takah ṭanpuina pawh an pe chhuak nasa a, infiamna lamah pawh sulhnu an ngah hle. Football - mipa, hmeichhia leh veteran bakah Basketball, Badminton leh Tennis inelna sanga team nei thei an ni.

Armed Veng hian YMA Branch nung ber zinga mi an la ni reng a, Mizo nun ze mawi la vawng nung veng an ni. Football vanga hming an chher rual hian CYMA buatsaih cricket leh athletics inelnaa champion hmasa ber an ni a, an khawtlang an ṭangrual hle.