Lukaku la khel dawn lo

Manchester United chuan vawiin tlai dar 5:30 hian Singapore National Stadium-ah Inter Milan an hmachhawn dawn a, Italian club-in lakluh an tum Romelu Lukaku a inlan dawn lo.

United manager Ole Gunnar Solskjaer chuan, "A la in fit lo a, chhawr theih a ni lo," tiin Romelu Lukaku chungchang a sawi a, amaherawhchu Belgian striker hi Leeds United nen an inkhelh pawha chhawr theih tura beisei a nih tawh avangin Old Trafford a chhuahsan a rinawm ta hle.

Nimin tlai khan Inter Milan manager Antonio Conte chuan, "Romelu ka duhzia chu inhre tlang vek ang. Kan team-ah hian player pawimawh tak a nih theih ngei ka ring," tiin a sawi. Italian manager chuan sawi chhunzawmin, "Kum 2016-2018 a Chelsea coach ka nih lai khan Chelsea-ah lakluh ka tum. Tuna kan dinhmun pawh kan hre tlang. Lukaku hi United player a ni a, lakluh theih dan kan zawng mek," tiin lakluh ngei an tum thu a sawi.

Conte hian Asia-a zin ve lo Mauro Icardi chu Inter Milan hmachhawpah a tel loh thu a sawi nawn leh a, Argentine striker hralhna man hian Lukaku hi lakluh an tum ang. Manchester United hian Australia tlawh tawhin Perth-ah khawtual club Perth Glory leh Leeds United te an hneh tawh a, vawiin tlaia Inter Milan an hmachhawn zawh hian Tottenham Hotspur (July 25), Kristiansund (July 30) leh AC Milan (August 3) te an khelhpui leh ang.

Norwegian manager Solskjaer chuan, "David leh Luke te an inkhelh tawh ngei ka ring," tiin Australia-a inlan lo David De Gea leh Luke Shaw chhawr theih an nih tawh thu a sawi. Singapore-ah hian defender Matteo Darmian leh midfielder Fred ten an rawn zawm a, rawlthar keeper Dean Henderson erawhin Asia a tlawh ve tawh lo.