Barca player-te coronavirus vangin enfiah dawn

Barcelona chuan zanin dar 1:30-ah Champions League round of 16 first leg khel turin Napoli an lenchilh dawn a, Italy an luh hmain coronavirus an vei leh vei loh enfiah vek an ni dawn. 

Italy-ah coronavirus vei mi 79 zet an awm tawh tih tun hnaiah hmuhchhuah a ni a, hei vang hian kartawp Serie A match li pawh a khelh hun sawn a ni hial. 

Coronavirus vang hian Italian health ministry an fimkhur lehzual a, Barcelona pawh hian match an khelh zawh rualin Italy hi rang taka chhuahsan an tum dawn a ni. 

Barcelona hian Sergi Roberto chu hliam vangin an chhawr thei dawn lo a, Roberto hian a malpuiah hliam a tuar - Catalan club chuan an player pawimawh hi kar hnih emaw kar thum tal a chawlh a ngaih tur thu an sawi. 

Spanish champion hian an league match hnuhnung berah 5-0 in Eibar an sawp a, Napoli tan hmuh nuam a ni lo - Lionel Messi chuan goal li ngawt a khung a, Argentine forward bawk hi buaipui ngai tur a ni leh dawn.

Mahse, Napoli hian inelna hrang hranga an match hnuhnung pathumah hnehna an chang vek a, heng zingah hian Coppa Italia semifinal first leg-a 1-0 a Inter Milan an hneh chu a tel. 

Manager rorum Gennaro Gattuso naute hian he result avang hian Barca pawh hneh theih an inbeisei ang tih a chiang a, zaninah inkhel hmuhnawm beisei ngam a ni.