Trau an chak chiang, Aizawl FC dinhmun a ṭha lo

Nilaini zan I League inkhelah Trau-in Indian Arrows 5-1 in an sawp a, panganaah an inhlangkai. First phase-ah match khat chauh khelh tur a awm tawh a, Aizawl FC-in pasarihna dinhmun an luah mek avangin Championship Stage khel lo thei dinhmunah an ding.

Kalyani Stadium-ah Trau tan Bidyashagar Singh-a'n goal hnih a khung a, Mayosing Khongreiwa, Komron Tursunov leh Chanso Horam ten goal khat ṭheuh an khung. Manipur club-in inkhel an thunun a, Indian Arrows tana Harsh Patre-a'n goal khat a khung chuan result a ti danglam pha lo.

Covid-19 vangin I League khelh dan phung an thlak a, inelna zawng zawng Kolkata-ah vek khelh a ni. Ṭum dangah chuan vawi hnih ṭheuh an inkhel chhuak ṭhin a, tun ṭumah erawh vawi khat khelh chhuah zawhah Championship Stage leh Relegation Stage khel tur an thliar dawn.

A sang parukin champion tur an zawng leh dawn a, an point neih sa an keng tel bawk ang. Tun dinhmunah Churchill Brothers, Real Kashmir leh Gokulam Kerala ten Championship Stage an lut tawh. I League-ah hian head to head en a nih avangin Sudeva Delhi, Chennai City, Neroca leh Indian Arrows te Relegation Stage-ah an awm tawh bawk.

Round Glass Punjab, Trau, Mohammedan leh Aizawl FC te dinhmun a la hriat loh a, team pali hawi lam tur hi March 1, Thawhṭanniah a hriat kim theih ang.

Aizawl FC-in an match hnuhnung berah Chennai City an hmachhawn dawn a, chak pawh ni se Relegation Stage-a tla thei dinhmunah an ding. Mizo club chunga awm RoundGlass

Punjab, Trau leh Mohammedan te hian Neroca, Sudeva Delhi leh Real Kashmir te an hmachhawn dawn. An khingpuite hi dinhmun hriat vek tawh a nih avangin Mizo club hmabak a harsa sawt ang.

Yan Law-a hoten Real Kashmir an hneh lo a, Mizo club hi Kashmir club kutah an innghat ta thung. Real Kashmir hian Mohammedan hi an hneh thei a nih chuan Aizawl FC tan parukna china inhlangkai turin Chennai City laka point hlawhchhuah a tawk ang. AFC hian Mohammedan hi 3-0 in an hneh a, an inkhelh tawhna an result hi an vanneihna thlentu a ni thei ang.

Mizo club hian Trau an hneh loh avangin Manipur club-in Sudeva Delhi an hneh a nih chuan Yan Law hote tan umphak nghaihna a awm tawh lo. Chutihrualin AFC tana chanchin lawmawm erawh Mohammedan leh Sudeva te hi anmahni aiin an khel hmasa zawk dawn a, hemi a nih avang hian phur takin Aizawl FC-in Chennai City an hmachhawn thei ang.

RoundGlass Punjab erawh Mizo club-in an hneh tawh lo a, head to head avangin Aizawl FC-in an umpha thei tawh lo. Hemi a nih avang hian Aizawl FC dinhmun hi February 28, Pathianni zanah a hriat vek ang.