Mumbai-in goal an sur tir

Indian Super League-ah Mumbai City-in AFC Champions League khelh an tumna an la thlah bik lo tih an pholang a, table mawngphah lama awm Odisha FC chu 6-1 ngawtin an sawp!

Odisha hian goal an khung hmasa zawk - Mizo tlangval Jerry Mawihmingthanga chu minute kuana lekah penalty area-ah tih tluk a ni a, Chanmari chhuanvawr hian penaty a hlawh chhuak. Odisha tan an goal khung hna thawktu Diego Mauricio chuan harsatna nei loin goal-ah a chantir a, Odisha hlim chhung erawh a rei lo hle.

Goal an chhuah aṭanga minute lina lekah Mumbai tan Bartholomew Ogbeche chuan si phurh a rawn sut a, Nigeria international hluiin goal-a khung hnuah chuan Mumbai club an hawikir tawh lo.

Manipur tlangval Bipin Singh chuan tun season ISL-a hattrick hmasa ber chu Mumbai club tan hian a rawn siam a, Ogbeche-a'n goal khat a khung belh leh bakah Cy Goddard chuan goal khat a thawh ve bawk. 

Odisha tan Jerry bakah Paul Ramfangzauva chuan inkhel bul a ṭan a, Mizo rawlthar Isak Vanlalruatfela chu minute 90-naah tlan lutin Indian Super League-a a match hmasa ber khelhtir a ni a, Bawngkawn rawlthar tan an result avangin zan chhinchhiah tlak erawh a ni lo. 

Mumbai club-in league match khat khelh tur an la neihah Pathianni zan hian an elpui ATK Mohun Bagan an hmachhawn dawn a, he inkhel hi Asian club football inelna sang bera India aiawh tur zawnna a nih dawn avangin a 'hot' dawn. 

Kalinga Warriors (Odisha sawina) hian tawnhriat nei ṭha Stuart Baxter enkawlna hnuaiah bul an ṭan a, mahse ban a nih hnuah assistant coach Gerald Peyton chuan team enkawl hna a thawk chunzawm. 

Peyton hian chhungkaw thil avangin Odisha match hnuhnung pahnih a enkaw thei lo zui a, a aiah hian coaching staff zinga mi Steven Dias chu ruat a ni - Indian David Beckham an tih ṭhin Dias hian danglamna a thlen thei lo tih chiang takin a lang.

Bagan hian league match khat khelh tur la awmah hian point 40 an nei mek a, an hnuai chiahah point 37 nei Mumbai an awm -club pahnih hian playoff an khel dawn tih chu a chiang daih tawh a, Champions League khel tur erawh a la chiang lo. 

Mumbai hian Bagan hi an hneh a nih chuan Kolkata club nen an point hmuh zat a inang dawn - ISL-ah team pahnih intluk an awmin season kal laia an lo intum tawhna (head-to-head) en hmasak zel a ni a, tun season-a an intawn hmasakah hian 1-0 in Mumbai an chak tawh. 

Chumi awmzia chu an match tawp berah Mumbai hian Bagan hi an hneh a nih chuan an point hmuh zat inang chiah dawn mah se head-to-head hmangin Champions League khel turin an tling daih thei a, Kolkata club tan draw result chauh pawh a tawk thung ang. 

ISL league round-a hmahruaitu hian League Winners' Shield an dawng ṭhin a, hei hian cheng nuai 50-a ken tel bakah AFC Champions League group stage match khel turin an tling nghal ṭhin a ni.