Real Madrid-in team ṭha Atalanta an hneh

A hunah tak Zinedine Zidane leh a naute an rah leh ta - Real Madrid chuan squad nem tak nena zin chungin Atalanta chu khualmualah 1-0 in an hneh. 

Champions League last 16 first leg inkhelah hian Real Madrid tan Ferland Mendy chuan inkhela goal awmchhun hi a khung a, second leg hi mahni muala khel tur an nih avangin an dinhmun a ṭha hle. 

Real Madrid-in hnehna an chan avangin inchhuang lutuk tur erawh an ni lo - minute 17-naah Atalanta midfielder Remo Freuler chu hnawhchhuah a nih avangin hun tam zawk chu player tam zawk ni chungin an khel.

Madrid boss Zidane chuan, "Player tam tak an khel thei lo a, mahse, kawng dik lam panin kan kal mek a ni. Tlarhnungah kan khawng ṭha a, chance siamsak lo chungin khualmualah goal kan khung bawk," tiin a sawi. 

Zidane-a'n hliam vangin a squad neih ṭhat ber  a fehchhuahpui thei lo a, first team aṭangin player pakua ngawt an zin thei lo - academy lam aṭangin player paruk lai hruai an ngaih phah hial. 

Player inlan thei lote hi squad tikimtu an ni satliah lo a, hmun pawimawh chang phak ṭhiau Karim Benzema, Sergio Ramos, Marcelo, Fede Valverde, Dani Carvajal leh Eden Hazard-te chu zin thei lo zingah an tel.

Atalanta hmachhawn tura zin Real squad pumpuiin tun season-a goal an khung tawh zat belhkhawm chu goal 23 a ni a, goal ruk khung tawh Casemiro aia khung hnem an awm lo. 

Heng zawng zawng ngaihtuah hian Real tan beisei tih san a har viau a, Madrid khaw club ṭantuten hlauthawng chunga inkhel an en a nih pawhin a awm lo hran lo. 

Mahse, vanneihnain Real lam a ṭang tlat - inkhel ṭan aṭanga minute 17-na lekah Remo Freuler chu goal khung thei dinhmuna ding Mendy lakah foul-in red card a hmu a, Atalanta-in player pakhata tlem chungin hma taka an khelh a ngaih phah.

Serie A lama goal khung uar tak Atalanta-in an tlem zawk hnuah goal nawr chi a ni lo tih an hria a, tlarhnung lama hun tam zawk hman an thlan avangin Real tan na taka nawr a harsa hle. 

Isco leh Marco Asensio-ten Real tan hun ṭha an nei ve bawk a, mahse, Atalanta goalkeeper Pierluigi Gollini tan hna harsaa sawi tur erawh an siamsak thei lo - Benzema awm loh a lang a, Real an hriam lo. 

Mahse, hun tawp nan minute li chauh a awm tawh tihah Real an vannei ta nge nge a, yard 25 vela hla aṭangin Ferland Mendy chuan Real tan goal mawi leh hlu tak a khung - hun tawp thlengin goal dang a lut lo a, Real an chak. 

Atalanta khan tharum an ngahin an chak em em a, tlarhnung an remphui ṭha hle bawk. Kan tan chuan result ṭha tak a ni a, chu chu a pawimawh lai ber chu a ni. Kan game an mawi tawk lo a ni mai thei a, mahse, a pawimawh ber chu goal kan khung a, kan chhuah loh bawk kha a ni. 

Kan duh anga kan khel chhuak thei lo kha hrehawm ka ti a, Player 10 kan nih kha chuan game kha a danglam tawh. Tlarhnung kan ven a ngai a, kan ti ṭha hlein ka hre bawk. 

Madrid-ah chak kan mamawh tihna a ni mai. Thil harsa a awm lo a, tlang turin kawng khat chauh kan nei a, ṭul loa ngaihtuahna sen vak a hun lo. Hnehna kan chan a ngai a ni mai.