Messi-a'n Barca a chei mawi leh ta

Sawiselna tam tak tawk ṭhin mah se a tawpah chuan Barcelona mawina chu Lionel Messi bawk a ni leh ṭhin a, Argentine forward hian Nilaini zan khan Catalan club tan goal hnih a khung leh ta. 

Barcelona hian La Liga inkhelah an mikhual Elche chu 3-0 in an hneh a, Messi-a'n goal hnih a khung bakah Jordi Alba chuan goal khat a khung ve leh bawk - Elche lamin a chhanletna tur an nei lo. 

Catalan club-in hnehna an chan avangin pathumnaah an awm chho a, hmahruaitu Atletico Madrid chu point ngain an phak lo mek - Atletico hian match khatin an khel tlem thung. 

Barca aia point hniha sangin Real chu pahnihnaah an awm a, Atletico-in an match hnuhnung pahnih aṭanga point khat chiah an hlawhchhuah theih bawk avangin La Liga nomawi inchuh boruak a sang chho hle. 

Barcelona-in first half chhung zawngin goal an khung lo a, second half-ah erawh goal khung turin hun an duh rei lo - chawlhlawk hman zawh aṭanga minute thumna lekah Messi-a inlar a, Martin Braithwaite-a'n 'backheel' hmanga a siamsak chu goal-ah a chantir.

Catalan club goal hmahruai luhna tura Messi tlan luh dan a mawi tluk zetin Braithwaite-a 'backheel' a class a, goal mawi bik huanga khung tlak a ni - minute 20-a liam a, Messi-a'n football thiam bik a nihzia a pholang nawn. 

Kum 33 mi forward hian Dutch midfielder Frenkie de Jong hnen aṭanga a ball hmuh ṭha tak chu defender panga ven karah tlan luhpuiin goal-ah a chantir a, player thiam bik lo tan chuan tih ve chi a ni lo. 

Barcelona an phur laklawh a, tawp mai an tum lo - an goal hnihna a luh aṭanga minute nganaah Jordi Alba hun a inher chhuak a, Braithwaite-a ball cross duhthusam chu an goal thumna ni turin a tauh lut. 

Lionel Messi-a'n nipui transfer-ah Barcelona chhuahsan a dil a, court-a amah siam liantu khin a duh loh avang chauhin Nou Camp-ah a cham chhunzawm. Kum 33 mi forward hi nipui transfer-ah a contract a tawp dawn a, a duh lam hawiin puanthuah a tel thei ang. 

Manchester City leh Paris Saint-Germain nena sawi zawm mek forward hian hei vang hian Catalan club-ah a rilru a pe tawk tawh lo nia sawiselna a tawk fo a, amah sawiseltuten ṭawngkam mawi leh hawihhawm an zawng ngai lo. 

Mahse, Elche lakah Messi hian a thiam a la theihnghilh lo tih a pholang nawn a, goal mawi bik pahnih nen a chuai tawh anga ngaitute a chhanglet leh ta - tun season La Liga-ah goal 18-a khung tawh. 

Messi hian tun season La Liga-ah match 22 khelin goal 18-a khung tawh a, amah hnaih bertu Luis Suarez aiin goal hnihin a khung tam zawk. 'A chuai tawh' tia an sawisel kumah league top scorer a ni mek.