Tottenham chak awlsam

Tottenham Hotspur chuan Nilaini zan khan an mikhual Wolfsberger chu 4-0 in an sawp a, inkhel pahnih belh khawmah 8-1 a chungnungin Europa League last 16 an inhlangkai.

Spurs hian khualmualah 4-1 in hnehna an chang sa tawh, London khawpuia an intawn lehnaah pawh Austrian club tan tih theih a awm lo. Jose Mourinho-a'n player neih ṭhat hahchawlhna hun pe chungin hnehna a chanpui thei tho.

Hliam vangin hun rei tak Alli a chawl a, a hliam dam hnuah manager thar Mourinho-a'n a chhawr ngai meuh lo. Chhuak tur angin thawm a nei a, mahse chhuak loin a club ngaiah khelh phak tumin thapui a thawh chhunzawm.

England international Alli-a'n hun ṭha pek a nih chu a bawhpelh lo, minute 10-na lekah boruaka in vawrh kang chungin goal hmahruai a bin lut a, second half-ah Alves Morais khung tur vawi hnih a siamsak bawk.

Bench aṭangin Gareh Bale dahluh a ni a, Real Madrid aṭanga an hawh forward hian a thiam a la theihnghilh lo tih lantir nan goal khat a khung ve leh bawk. Europa League-ah goal li chhuah hmasak hnuah eng club mah an la tho chhuak ngai lo, Wolfsberger pawhin thawnthu an thlak thei ta lo a ni.

Tottenham manager Mourinho chuan, "Engkim mai kha kan ruahman ang vekin a kal a ni ber mai, mahni goal venghim ṭha tak chung siin goal tam tak kan khung thei, khatiang baka duhthusam a awm thei tawh chuang lo.

"Player hliam thar an awm lo a, a pawimawh ber erawh round sang zawkah kan inhlangkai thei kha a ni," tiin a sawi. Portuguese manager hian English club hi nomawi chawi pui a tum ruh hle.

Spurs hian Pathianni zanah Premier League khel turin Burnley an mikhual zui dawn. League table-ah pakuana dinhmun an luah mek a, a sang pali zinga tel an duh a nih chuan chetsual a thiang tawh dawn lo.