Musiala-a'n Germany a thlang

Bayern Munich midfielder Jamal Musiala chuan Germany leh England a buk a, Die Mannschaft tana khelh a thlang.

Kum 18 mi Musiala chuan, "Germany leh England tana khelh ka duh ve ve a, mah se pakhat chauh ka thlang thei. Uluk takin ka hmalam hun tur ka ngaihtuah a, Germany hi ka tana ṭha tur zawkah ka ngai," tiin 2014 World Cup champion tana khelh a thlan thu a sawi.

Musiala hian vawiin hian kum 18 a tling chiah a, February 26, 2003 khan Stuttgart, Germany-ah a piang. A pa hi British-Nigerian niin a nu hi German a ni thung. Chelsea academy-ah Musiala hi kum riat chhung a awm a, July 2019 khan Bayern Munich a zawm. England tan U15, U16, U17 leh U21-ah a khel tawh a, Germany tan U16-ah a khel tawh bawk.

Bayern midfielder Musiala chuan, "Thutlukna awlsam a ni lo. Germany hi ka pianna hmun a ni a, England hi football ka khelh ṭanna niin ṭhian pawh ka la ngah hle," tiin a sawi.

Champions League-ah pawh Musiala hi Bayern tan a inlan tawh a, Lazio nen last 16 first leg an inkhelh ṭumin goal a khung. Musiala hian kum 17, thla 11 leh ni 28 mi niin goal a khung a, Barcelona rawlthar pahnih Pedri (kum 17, thla 10 leh ni 25) leh Ansu Fati (kum 17, thla 11 leh ni 19) te chiah goal khung naupan lamah tluk loh a nei a ni.

Germany head coach Joachim Low chuan, "Jamal Musiala-a'n Germany tana khelh a thlang hi ka lawm hle. Oliver Bierhoff nen Munich-ah kan hmu a, engmah kan la thu kan la tiam thei lo. Chutihrualin March thlaah match thum khelh tur a awm avangin squad-ah koh a ni ang a, chumi hunah chuan kan inhre chiang lehzual ang," tiin a sawi.

Low hian Thomas Muller, Jerome Boateng leh Mats Hummels te ram tana khelh a tum tawh loh thu a sawi a, Bild erawhin Muller chungchangah ngaihtuahna a seng ṭha dawn niin an ziak. Kum 30 mi Muller hi March thlaah koh a la ni dawn lo a, season tawpah a chungchang hi ngaihtuah a ni ang.

March thla tawp hian World Cup qualifying khelh a ni dawn a, Germany hian Iceland, Romania leh North Macedonia te an hmachhawn dawn. Euro 2020 chu Covid-19 vangin inkhelh hun sawn a ni a, kumin June 11 aṭanga khelh ṭan a ni ang.