Manchester City an chak awlsam

Premier League hmahruaitu Manchester City-in Champions League-ah an chet ṭhat an chhunzawm a, Nilaini zan khan inkhel thunun chungin Borussia Monchengladbach 2-0 in an hneh. Pep Guardiola hote hian vawi 19 chhung a zawnin hnehna an chang tawh a, Premier League chauh ni loin Champions League-ah pawh champion rinkai an ni pha.

Covid-19 vangin UCL last 16 first leg hi Germany-ah khelh theih a ni lo a, Puskas Arena, Hungary-ah khelh a nih avangin Gladbach-in hamṭhatna a nei lo. City tan Bernardo Silva leh Gabriel Jesus ten hun chanve hma lam leh hnu lamah an khung. Second leg hi March 16, Thawhlehni zan hian Etihad Stadium-ah khelh a ni ang.

Man City-in Premier League-a Arsenal an hmachhawn ṭumini Kevin de Bruyne an chhawr tawh a, Champions League-ah erawh Belgian midfielder hi hahdamtir a ni thung.

Pep Guardiola-a'n Gunners hmachhawn tute aṭangin player panga ngawt a thlak a; De Bruyne, John Stones, Oleksandr Zinchenko, Fernandinho leh Riyad Mahrez te aiah Kyle Walker,

Aymeric Laporte, Phil Foden, Rodri leh Jesus te an lut. Player panga ngawt a thlak chung pawhin an ṭhat dan a ngai reng a, Man City squad chhahzia a lang.

Puskas Arena-ah minute nga chhung lekin Raheem Sterling leh Phil Foden te goal-ah an hlauhawm nghal a, Man City-in minute 45 chhung inkhel an thunun hneh hle. Chutihrualin Pep-a hoten hian Gladbach lakah chance ṭha insiam an harsat thung.

Minute 29-naah Joao Cancelo cross chu Bernardo Silva-a'n a tauh lut a, Gladbach keeper Yann Sommer tan dan theih a ni lo. Second half-ah Gladbach insiamṭha hretin Denis Zakaria cross chu Alassane Plea-a'n a khawih kawi hnuah goal chhungah a lut teuh hle.

City tan wing back Cancelo a hmuhnawm a, Portuguese defender cross chu Bernardo Silva-a'n a tauh letin Gabriel Jesus-a'n goal-ah a chantir. Minute 65-naah Man City-in 2-0 in hma an hruai a, goal dang hmuh tur a awm tawh lo.

Man City chungnung mah se Rodri pass sual chu Gladbach substitute Hannes Wolf-a'n um lutin keeper Ederson-a'n ṭha takin a dang. Pep Guardiola hoten an phu angin hnehna an chang a, an ke pakhat zawkin quarterfinal an rap tawhah a ngaih theih.

Manchester City manager Pep Guardiola chuan, "A tlangpui chuan kan khel ṭha thawkhat khawp mai. Amaherawhchu goal hmaah tun aia kan hriam kha a ngai. Champions League anga inelna sangah hi chuan tihsual a thiang lo a, kan insiamṭhat ngei a ngai. Inkhel kan thunun a, hun tawp lamah kan tihsual vangin chance an nei a ni," tiin hmasawnna tur a awm thu a sawi.

Gladbach manager Marco Rose chuan, "Kan khingpui an ṭha a, an chet ṭhat vanglai kan tum bawk avangin dan an harsa a ni. Chak zo lo mah ila ka naute an khel ṭha a, second leg-ah chak tumin kan khel ang," tiin a sawi. Rose hian season tharah Borussia Dortmund a enkawl ang.

Man City hian Inrinni zanah West Ham an mikhual dawn a, hemi zawh hian Wolverhampton Wanderers, Manchester United, Southampton leh Fulham te an hmachhawn zui dawn.