Laureus Award dawng thei an puang

Khawvel pum huapa infiammite chawimawina langsar leh ngaihhlut, mimal leh team chawimawina ni bawk Laureus World Sports Awards 2021 dawng thei tur chu Nilaini zan khan an puang ta.

Award dawng tur hi khawvel huapa sports media ten an thlan a ni a, May thlaah lawmman hi an sem ang. Nikum khan Lionel Messi leh Lewis Hamilton te chuan chawimawina ngaihhlut Sportsman of the Year Award an dawng.

Barcelona captain Messi hming a lang nawn lo, Sportsman of the Year Award huangah hian vawi nga dawng tawh Roger Federer chu record nei ṭha ber a ni. Swiss star hian Comeback of the Year pawh vawi khat a lo dawng tawh.

Season hmasa khan infiamna kawng hrang hrangah mimal che ṭha an tam. Sportsman of the Year Award hi a ngaihnawm ber a ni leh tura ngaih a ni. Bayern Munich striker Robert Lewandowski chu football aṭanga hming lang a ni.

Poland international hian nikum chhung khan inelna hrang hrangah goal 45 a khung, amah hnaih bertu chu Cristiano Ronaldo (41 goals) a ni. Lewy hian German club hi Champions League leh Bundesliga a lakpui hial.

Mipa chawimawi theih zingah a vawi sarih nana Formula 1 champion ni thei Lewis Hamilton a awm bawk. Britain tlangval hian Michael Schumacher (7 titles) a nihrual tawh a, NBA vawi li champion tawh LeBron James a awm bawk.

Kum 2011 a chawimawina dawng tawh Rafael Nadal pawh chhawp chhuah zingah a tel. Nikum khan Nadal hian a vawi 13 nan French Open nomawi a chawi a, Grand Slam champion hnem ber Roger Federer (20 titles) a nih rual bawk a ni.

Sportswoman of the Year Award dawng thei chhawp chhuah zingah Naomi Osaka chu Mizote hriat hlawh tur a ni. Japanese nula, tennis khel thiam hian nikum khan a vawi nih nan US Open title a, Tokyo Olympic kha neih theih ni se a langsar zual ngei ang.

Tennis world number 2 Osaka chuan, "Laureus Award hi chu khawvel pumin a ngaihsan a ni a, khelmual chhunga kan chet dan bakah pawn lamah entawn tlakin kan awm em tih a pawimawh bawk. Chhawp chhuah zinga tel ringawt pawh hi ka tan chuan a hlu," a ti.

Osaka hian nikum thleng khan Grand Slam nomawi pathum a chawi a, kuminah Australian Open a lak belh leh tawh. Lyon tan a zawna hmeichhe football Champions League nomawi vawi nga lakpuitu Wendie Renard pawh dawng thei tura rin hlawh a ni.

Nikum khan Simone Biles kutah chawimawina hlan a ni, kuminah erawh American gymnast hi a hming a lang tawh lo. Biles hian Olympic leh Worold Championship huangah chauh pawh gold medal 30 a la tling tawh.

Hansi Flick kaihhruaina hnuaia Champions League, Bundesliga leh German Cup latu Bayern Munich chu Team of the Year Award dawng tura rinkai an ni a, football team aṭangin kum 30 hnua English Premier League champion ni thei Liverpool an tel bawk.

LeBron James hoin Los Angeles Lakers chuan an ropuina an nei let a, kum 10 chhung zet an hlawhtlin loh hnuah Lakers hian NBA title an la - basketball inelna sang berah hian vawi 17 a champion tlinna chiah a ni hial.

Team che ṭha sawi dawn chuan Mercedes hmaih a thiang lo. Anni hian a zawna a vawi sarih nan Formula 1 Constructors’ Championship an la - team ṭha Ferrari leh Red Bull te pawhin tun hnaiah chuan an el phak lo hle.

Kum 1970 hnu lama a vawi khat nana Super Bowl latu Kansas City Chiefs leh Argentina Men's Rugby Team te pawh an tel. Argentina tlangvalte hi a vawi thum nan world champion an ni thei, an kalna kawngah chuan chhuanawm tak vek an ni.

Joshua Cheptegei    Uganda    Athletics

Armand Duplantis    Sweden    Athletics

Lewis Hamilton    UK    Formula 1

LeBron James    USA    Basketball

Robert Lewandowski    Poland    Football

Rafael Nadal    Spain    Tennis

Anna van der Breggen    Netherlands    Cycling

Federica Brignone    Italy    Skiing

Brigid Kosgei    Kenya    Athletics

Naomi Osaka    Japan    Tennis

Wendie Renard    France    Football

Breanna Stewart    USA    Basketball

Rugby Team    Argentina    Rugby

Bayern Munich    Germany    Football

Kansas City Chiefs    USA    American Football

Liverpool    UK    Football

Los Angeles Lakers    USA    Basketball

Mercedes    Germany    Formula 1

Ansu Fati    Spain    Football

Patrick Mahomes    USA    American Football

Joan Mir    Spain    Motor Cycling

Tadej Pogacar    Slovenia    Cycling

Iga Swiatek    Poland    Tennis

Dominic Thiem    Austria    Tennis

Daniel Bard    USA    Baseball

Kento Momota    Japan    Badminton

Alex Morgan    USA    Football

Max Parrot    Canada    Snowboarding

Mikaela Shiffrin    USA    Skiing

Alex Smith    USA    American Football

Boxgirls    Kenya    Boxing

Fundación Colombianitos    Colombia    Football & Rugby

KICKFORMORE    Germany    Football