ISL-ah engkim a chiang ta
Indian Super League enkawltu Football Sports Development Limited (FSDL) hotunu Nita Ambani chuan ISL final khelhna tur hmun a puang a, Goa chuan India rama league sang ber champion zawnna hi a thleng ang.
ISL league round-ah FC Goa chu point hmu sang ber niin ISL League Shield dawng hmasa ber an ni a, season tharah AFC Champions League an khel dawn bawk.
Hetihlai hian league round khel zo turin ISL-ah match khat chiah a awm tawh bawk a, zanin dar 7:30 hian league round-a match hnuhnung ber chu NorthEast United leh Chennaiyin FC ten an khel dawn bawk.
Pathianni zan khan Indian Super League-ah inkhel pakhat a awm bawk a, goal riat ngawt a lut - Odisha FC leh Kerala Blasters te 4-4 in an inhnehtawk a, Jerry Mawihmingthanga chu Emerging Player of the Match-ah thlan a ni.
Goal riat luhna
Odisha-ah Kerala Blasters an lenglut a, Bengaluru aṭanga loan hmanga Odisha zawmtu Manuel Onwu chuan hattrick siam nan a lo hmang - mahse, minute 80 hnu lama Bartholomew Ogbeche penalty pahnih hmangin point an hlawh let hram.
Minute khatna lekah Jerry Mawia assist duhawm chu Onwu-a'n goal-ah a chantir a, mahse minute nga hnu lawkah Narayan Das chuan an lamah ti lutin Blasters si phurh a sutsak.
Messi Bouli-a'n Blasters hma a rawn hruaipui zui a, mahse Onwu (2) leh Martin Guedes ten khung lehin 4-2 a ni daih - South Indian club an vannei a, minute 80 hnu lamah penalty vawi hnih an hlawh chhuak a, Ogbeche chuan goal-ah a chantir ve ve.
Odisha tan Jerry bakah Daniel Lalhlimpuia chuan inkhel bul a ṭan a, bench aṭangin Lalchhuanmawia Fanai a lut bawk. Blasters tan Lalruatthara'n inkhel bul a ṭan a, Samuel Lalmuanpuia'n minute 81-naah a thlak.
Hmabak chu
Zanin dar 7:30-ah semifinal lut chiang tawh leh dinhmun danglam thei tawh lo NorthEast United an inkhel dawn a, team pahnihin khelhna hmun chang tam lo player luhtir nan an hman a rinawm zawk.
Club pahnih inkhelh zawh rual hian league round pawh a zo ve nghal dawn a, semifinal lam hawiin ISL an inbuatsaih zui thei ang - FC Goa, ATK, Bengaluru FC leh Chennaiyin FC chu semifinal khel tura tling an ni.
ISL semifinal hi home & away-a khelh tur a ni dawn a, semifinal match hmasa ber hi February 29-ah khelh a ni ang a, March 8-ah semifinal match te khelh zawh vek turin ruahmanna an siam.
March 14-ah final chu FC Goa-in an thleng dawn a, Goan club hian final an luh chuan champion chance an nei sang hle dawn tihna a ni. Semifinal-ah hian FC Goa hian palina Chennaiyin an hmachhawn ang a, ATK leh Bengaluru FC an inhmachhawn thung ang.
Zanin Inkhel Tur
NorthEast United 7:30 PM Chennaiyin FC
Team Dinhmun
# Team Pld W D L GF GA GD Pts
1 Goa 18 12 3 3 46 23 23 39
2 ATK 18 10 4 4 33 16 17 34
3 Bengaluru 18 8 6 4 22 13 9 30
4 Chennaiyin 17 8 4 5 30 24 6 28
5 Mumbai City 18 7 5 6 25 29 -4 26
6 Odisha 18 7 4 7 28 31 -3 25
7 Kerala Blasters 18 4 7 7 29 32 -3 19
8 Jamshedpur 18 4 6 8 22 35 -13 18
9 NorthEast United 17 2 7 8 14 28 -14 13
10 Hyderabad 18 2 4 12 21 39 -18 10