Ajax-in Brazilian winger an lalut

Dutch club ṭha Ajax chuan Brazilian winger Antony Matheus dos Santos chu Sao Paulo aṭangin an lalut a, kum 19 mi rawlthar duhawm hi kum nga chhung atan contract an ziahpui - July-ah a zawm chauh thung ang. 

Ajax hian Santos manah hian pound maktaduai 13 an pe phawt dawn a, a chet ṭhat dan a zirin a man zat hi pound maktaduai 18.2 thlenga la sang chho leh thei tur a ni. 

Europe-ah pawh club langsar ni phak Ajax hian an player chhuanvawr Hakim Ziyech chu Chelsea-a kal an lo remti tawh a, Premier League club hi nipui transfer-ah pound maktaduai 33.3-in a zawm dawn.

Ajax director of football Marc Overmars chuan, "Position tina khel thei player thiam bik kan lalut a ni," tiin an player thar chungchang a sawi a, Ziyech nen khaikhin a hlawh ang. 

Overmars chuan sawi zawmin, "Nipui transfer lo thleng turah kan player ṭhenkhatin min chhuahsan dawn a, chumi atan chuan ruahmanna kan lo neih lawk hi a ṭha a ni," a ti. 

Sao Paulo youth system chhuak Antony hian Brazil Under 23 tan match kua khel tawhin goal nga a khung a, Sao Paulo tan hian November 2018 khan a senior match hmasa ber khelin inelna hrang hranga a match 42-ah goal li a khung.